ისრაელმა გაეროში დევნილთა შესახებ რეზოლუციის კენჭისყრისას თავი შეიკავა, თუმცა საქართველოს სუვერენიტეტს სრული მხარდაჭერა გამოუცხადა

გაეროს გენერალურ ასამბლეაზე საქართველოს ოკუპირებული ტერიტორიებიდან იძულებით გადაადგილებულ პირთა და ლტოლვილთა სტატუსის შესახებ მორიგი რეზოლუციის კენჭისყრისას ისრაელმა პოზიციის დაფიქსირებისგან თავი შეიკავა. მიუხედავად ამისა, კენჭისყრის დასრულების შემდეგ, ისრაელის მისიის წარმომადგენელმა სიტყვით გამოსვლისას ხაზგასმით აღნიშნა, რომ იერუსალიმის პრინციპული პოზიცია საქართველოს სუვერენიტეტის მიმართ უცვლელი რჩება.

„გთხოვთ, ნება მიბოძოთ, გამოვთქვა ჩემი მოსაზრება მიღებული რეზოლუციის კენჭისყრასთან დაკავშირებით, სახელწოდებით „აფხაზეთიდან (საქართველო) და ცხინვალის რეგიონიდან/სამხრეთ ოსეთიდან (საქართველო) იძულებით გადაადგილებულ პირთა და ლტოლვილთა სტატუსის შესახებ“.

ისრაელის პრინციპული პოზიცია მდგომარეობს საქართველოს ტერიტორიული მთლიანობისა და სუვერენიტეტის სრულ და უპირობო მხარდაჭერაში მის რეგიონებთან - აფხაზეთსა და ცხინვალთან მიმართებით. ჩვენ ვიზიარებთ საერთაშორისო დოკუმენტებზე დაფუძნებული, ურთიერთშეთანხმებული გადაწყვეტილების შემუშავების განზრახვას.

ისრაელი ყოველთვის მხარს უჭერდა და მომავალშიც გააგრძელებს იმ ინიციატივების მხარდაჭერას, რომლებიც მიმართულია ნდობის აღდგენისა და სტაბილურობის განმტკიცებისკენ, მათ შორის ერთობლივ პროექტებს ისეთ სფეროებში, როგორიცაა სოფლის მეურნეობა. ჩვენ მიგვაჩნია, რომ ამ ძველი კონფლიქტების მოგვარების გზა მოლაპარაკებებზე დაფუძნებულ მიდგომაში მდგომარეობს“, - აღნიშნა მან.