ჯეი დი ვენსი: ირანთან სამშვიდობო მოლაპარაკებები რთული იქნება და დროს მოითხოვს

იმ ფონზე, როდესაც თეირანი უარყოფს ვაშინგტონთან მოლაპარაკებების გამართვას, აშშ-ის ვიცე-პრეზიდენტმა, ჯეი დი ვენსმა ოთხშაბათს განაცხადა, რომ ირანთან სამშვიდობო მოლაპარაკებები „რთული იქნება და დროს მოითხოვს“.

მან ასევე დასძინა, რომ „ირანელები უაღრესად რთული ხალხია“ და მათ „დანაწევრებული სისტემა“ აქვთ.

Fox News-თან ინტერვიუში ვენსმა აღნიშნა: „ჩვენი ამოცანაა, ამ ვითარებაში მივაღწიოთ საუკეთესო შედეგს როგორც ამერიკელი ხალხისთვის, ისე შეერთებული შტატების პრეზიდენტისთვისაც“.

„და მჯერა, რომ საბოლოოდ სადაც მივალთ - თუმცა ეს პროცესი რთული იქნება და დროს მოითხოვს - სადაც საბოლოოდ აღმოვჩნდებით, აი, როგორც ხედავთ, ნავთობის ფასი დღეს, მგონი, $79 იყო“, - განაცხადა ვენსმა. „ნავთობის ეს ფასები დაიწევს და დაბალ ნიშნულზე შენარჩუნდება. ირანს არასდროს ექნება ბირთვული იარაღი, ხოლო შეერთებული შტატები გაცილებით ძლიერ პოზიციაში იქნება“.