კახა კალაძე ევროპულ ბიუროკრატიაზე: დღეს უკვე აბსოლუტურად ღიად უპირისპირდებიან ქართულ სახელმწიფოს
ჩვენთვის, ქართული საზოგადოებისთვის ნამდვილად აღარ არის სიახლე, რომ ევროპული ბიუროკრატია ებრძვის ქართულ სახელმწიფოს, - განაცხადა გადაცემაში „იმედი Live” თბილისის მერმა და „ქართული ოცნების“ გენერალურმა მდივანმა კახა კალაძემ.
მისივე თქმით, გარე შემოტევები ბოლო წლებში კიდევ უფრო აშკარა გახდა.
„წლების წინ თუ ამას მალულად, ფარულად, არასამთავრობო ორგანიზაციების ჩართულობით, გარედან შემოსული ფულით, პოლიტიკაში ამ ფულის დახარჯვით აკეთებდნენ, დღეს უკვე აბსოლუტურად ღიად უპირისპირდებიან ქართულ სახელმწიფოს. ამას აქვს თავისი ახსნა. პირველი, ხაზი მინდა გავუსვა იმას, რომ ყველა მათი განცხადება და მუქარა დაფუძნებულია ტყუილზე. მეორე ის, რომ საქართველოს ხელისუფლებამ აიჩია მშვიდობა. საქართველოს ხელისუფლება თავისი მტკიცე პოზიციით არ შეუერთდა სანქციებს, რომელიც დამღუპველი იქნებოდა ქართული ეკონომიკისთვის და ქართველი ხალხისთვის. ქართველმა ხალხმა აირჩია სიმშვიდე, ქვეყანა ვითარდება, ეკონომიკურად წინ მიდის“, - განაცხადა კახა კალაძემ.
„ქართული ოცნების“ გენერალური მდივნის თქმით, საქართველოს ხელისუფლება ნებისმიერ დროს მზად არის გარკვეულ საკითხებზე დიალოგისთვის, თუმცა მუქარა მიუღებელია.
„ჩვენ არაერთხელ გავაკეთეთ განცხადება, რომ გვჭირდება მეგობრები, პარტნიორები. ნებისმიერ დროს მზად ვართ, ღიად ვისაუბროთ გარკვეულ საკითხებზე, თუმცა ჩვენთვის მიუღებელია მუქარის შემცველი განცხადებები, ის ზეწოლა, რომელიც ხორციელდება ქართულ სახელმწიფოზე“, - განაცხადა კახა კალაძემ.
