ხარკოვის ოლქში რუსეთის იერიშს 10 ადამიანი ემსხვერპლა

ხარკოვის ოლქის სოფელ პეჩენეგიში რუსეთის სარაკეტო დარტყმის შედეგად 10 ადამიანი დაიღუპა. ინფორმაციას ხარკოვის საოლქო სამხედრო ადმინისტრაციის ხელმძღვანელი, ოლეგ სინეგუბოვი ავრცელებს. მისი ცნობით, დაშავდა 17 ადამიანი, მათ სამედიცინო დახმარება უტარდებათ. იერიშის შედეგად ასევე დაზიანდა 10 კერძო სახლი, კაფე, ფოსტა, მაღაზია და რამდენიმე ავტომობილი.

„ამ რუსულ დარტყმას აუცილებლად ვუპასუხებთ და არანაკლებ მნიშვნელოვანია, რომ პარტნიორებმაც დაუმატონ ჩვენს სამართლიან პასუხებს რუსეთზე ზეწოლა და უკრაინის მხარდაჭერისკენ მიმართული საკუთარი ნაბიჯები“, - დაწერა თავის Telegram-არხზე უკრაინის პრეზიდენტმა ვოლოდიმირ ზელენსკიმ.

გარდა ამისა, რუსულმა ჯარებმა იერიში მიიტანეს ხარკოვის ოლქის ქალაქ იზიუმის საცხოვრებელ სექტორზე, რის შედეგადაც დაშავდა 5 ადამიანი, მათ შორის 9 წლის ბიჭი.

უკრაინის შეიარაღებული ძალების საჰაერო ძალების მონაცემებით, ღამით რუსეთის ფედერაციის შეიარაღებულმა ძალებმა უკრაინას 147 უპილოტო საფრენი აპარატით შეუტიეს. წინასწარი მონაცემებით, უკრაინის საჰაერო თავდაცვამ ქვეყნის ჩრდილოეთით, სამხრეთსა და აღმოსავლეთით 111 რუსული უპილოტო საფრენი აპარატი ჩამოაგდო ან ჩაახშო.