ხათუნა თოთლაძე: ინოვაციების ჰაბი არ იქნება მხოლოდ სივრცე. ეს იქნება პლატფორმა, სადაც დაკავშირება მოხდება ამერიკული და გლობალური ბიზნესკომპანიების ქართულ კომპანიებთან

ჩვენი დიპლომატიური რესურსი მაქსიმალურად არის მობილიზებული იმისთვის, რომ გავხსნათ მნიშვნელოვანი კარი ჩვენი სტარტაპერებისთვის, ჩვენი ნიჭიერი ახალგაზრდებისთვის, - განუცხადა ჟურნალისტებს აშშ-ში საგარეო საქმეთა მინისტრის მოადგილე ხათუნა თოთლაძემ, რომელიც სან ფრანცისკოში, საქართველოს გენერალური საკონსულოს ბაზაზე ინოვაციების ცენტრის გახსნას დაესწრება.

„ჩვენი დიპლომატიური რესურსი მაქსიმალურად არის მობილიზებული იმისთვის, რომ გავხსნათ მნიშვნელოვანი კარი ჩვენი სტარტაპერებისთვის, ჩვენი ნიჭიერი ახალგაზრდებისთვის, რომლებსაც ინოვაციების ჰაბის გახსნის შემდეგ ექნებათ შესაძლებლობა, რომ თავიანთი შესაძლებლობა მაქსიმალურად გამოიყენონ ამერიკული კაპიტალის მიმართულებით.

ინოვაციების ჰაბი არ იქნება მხოლოდ სივრცე. ეს იქნება პლატფორმა, სადაც დაკავშირება მოხდება ამერიკული და გლობალური ბიზნესკომპანიების ქართულ კომპანიებთან. ეს არის მნიშვნელოვანი განაცხადი საქართველოს მხრიდან, რომ ჩვენ როგორც პროგრესული, თანამედროვე სახელმწიფო ვიმკვიდრებთ ადგილს მსოფლიოს ბაზარზე და ვცდილობთ დავანახოთ მსოფლიოს, თუ რამდენად მნიშვნელოვანი რესურსი შეიძლება ჰქონდეს ჩვენს სახელმწიფოს, როგორი ამბიციური შეიძლება იყოს საქართველო ამ თვალსაზრისით“, - აღნიშნა თოთლაძემ.