კობა კობალაძემ უკრაინაში დაღუპული დავით ქუქჩიშვილის ხსოვნას პატივი მიაგო

ვეტერანების საქმეთა სახელმწიფო სამსახურის დირექტორმა, გენერალ-მაიორმა კობა კობალაძემ სამსახურის წარმომადგენლებთან და ვეტერანებთან ერთად, რუსთავში, გრიგოლ ხანძთელის სახელობის ტაძარში, რუსეთ-უკრაინის ომში დაღუპული ქართველი მებრძოლის, დავით ქუქჩიშვილის ხსოვნას პატივი მიაგო და მის ოჯახსა და ახლობლებს მიუსამძიმრა. ინფორმაციას ვეტერანების საქმეთა სახელმწიფო სამსახური ავრცელებს.

„თანამებრძოლების ინფორმაციით, „ქართველი პარტიზანების“ მეთაურის, დავით ქუქჩიშვილის ავტომობილი, ნაღმზე მაშინ აფეთქდა, როცა იგი დაჭრილი და დაღუპული მებრძოლების ველიდან გამოყვანას ცდილობდა. ქართველი მეომარი 26 ივნისს დაიღუპა.

49 წლის დავით ქუქჩიშვილი, აფხაზეთის ომის ვეტერანი იყო, უკრაინაში კი, რუსული აგრესიის წინააღმდეგ, 2014 წლიდან იბრძოდა.

დავით ქუქჩიშვილი, დღეს, რუსთავში, სამხედრო პატივით დაკრძალეს.

მსუბუქი ყოფილიყოს მისთვის ქართული მიწა!

ინფორმაციისთვის, ომის დაწყების პირველივე დღეებიდან, უკრაინაში, რუსული აგრესიის წინააღმდეგ, რამდენიმე ასეული ქართველი მოხალისე იბრძვის. მოხალისეთა პირველი ნაკადი, საქართველოდან, უკრაინაში, 2022 წლის მარტის დასაწყისში წავიდა. ისინი სხვადასხვა ბატალიონში ირიცხებიან და მონაწილეობენ საომარ მოქმედებებში, ფრონტის წინა ხაზზე. უკრაინაში რუსეთის სრულმასშტაბიანი შეჭრიდან და ომის დაწყებიდან (2022 წლის 24 თებერვლიდან) დღემდე, უკრაინის ტერიტორიული მთლიანობისათვის ბრძოლაში 100-მდე ქართველი მებრძოლი დაიღუპა", - აღნიშნულია ინფორმაციაში.