ლაშა დოლიძემ თავის უზბეკ კოლეგასთან საქართველოსა და უზბეკეთს შორის სოფლის მეურნეობის დარგში სამომავლო თანამშრომლობის პერსპექტივები განიხილა
გარემოს დაცვისა და სოფლის მეურნეობის მინისტრის მოადგილე ლაშა დოლიძე უზბეკეთის რესპუბლიკის სოფლის მეურნეობის მინისტრის მოადგილეს კაჰრამონ იულდაშევს შეხვდა. ინფორმაციას გარემოს დაცვისა და სოფლის მეურნეობის სამინისტროს პრესსამსახური ავრცელებს.
შეხვედრაზე მხარეებმა საქართველოსა და უზბეკეთს შორის სოფლის მეურნეობის დარგში სამომავლო თანამშრომლობის პერსპექტივები განიხილეს.
საუბარი შეეხო აკვაკულტურის, მევენახეობა-მეღვინეობის, სამეცნიერო-კვლევითი, საგანმანათლებლო, ასევე, სოფლის მეურნეობის დარგში ციფრული ტექნოლოგიების დანერგვის მიმართულებით თანამშრომლობის და გამოცდილების გაზიარების მნიშვნელობის საკითხებს. „ცოდნის, გამოცდილებისა და საუკეთესო პრაქტიკის ურთიერთგაზიარება, დარგში თანამედროვე ტექნოლოგიების დანერგვა და ერთობლივი პროექტების განხორციელება ორ ქვეყანას შორის თანამშრომლობის გაღრმავებას და სოფლის მეურნეობის სექტორის მდგრად განვითარებას შეუწყობს ხელს“, - აღნიშნა ლაშა დოლიძემ. როგორც კაჰრამონ იულდაშევმა აღნიშნა, უზბეკეთი განსაკუთრებულ მნიშვნელობას ანიჭებს საქართველოსთან აგრარულ სექტორში თანამშრომლობის გაღრმავებას და მზად არის ორმხრივად საინტერესო და სასარგებლო პროექტების განხორციელებისთვის. გარემოს დაცვისა და სოფლის მეურნეობის სამინისტროში გამართულ შეხვედრას შესაბამისი სამსახურების ხელმძღვანელი პირები ესწრებოდნენ.
