ლევან მაჭავარიანი ევროკავშირის სანქციების 21-ე პაკეტში ყულევის ნავთობგადამამუშავებელი ქარხნის შეტანის გადაწყვეტილებაზე: ეს არის ზეწოლა

პარლამენტის ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა, გადაცემაში „დღის ქრონიკა“ ევროკავშირის სანქციების 21-ე პაკეტში ყულევის ნავთობგადამამუშავებელი ქარხნის შეტანის გადაწყვეტილებას ეხმიანება.

მაჭავარიანი მიიჩნევს, რომ ეს გადაწყვეტილება არის ზეწოლა.

„ეს არის აბსურდი. თუ დასანქცირებულია, თუკი ფაქტები და მტკიცებულებები არსებობს, რომ ატარებდა სანქცირებულ პროდუქციას, ან სანქცირებულ გემებს, მაშინ პირდაპირ დაასანქცირებდნენ.​ რამდენიმე თვის წინ, ყულევის პორტის შეტანას აპირებდნენ სანქცირებული პორტების სიაში, თუმცა, როდესაც ჩვენ მტკიცებულებები და ფაქტები მოვითხოვეთ, ვერაფერი წარმოადგინა ბრიუსელმა და მაქედან გამომდინარე სიიდან ამოღება მოუწიათ. მაგრამ იმავეს აგრძელებენ. ჩვენს საზოგადოებას სწორად განვუმარტოთ, რადგან აგენტურული ოპოზიცია და მათი მედიასაშუალებები ამ ყველაფერ იმისთვის იყენებენ, რომ თითქოს რაღაცა დასანქცირდა, არაფერი დასანქცირებულა! პირობითად ჩაწერილია 6 თვე, რომ თუ 6 თვის განმავლობაში, რუსული ნავთობი, რომელიც სანქცირებული არ არის, არ შეწყვეტს ყულევის პორტი ამ ნავთობის მიღებასა და გადამუშავებას, მერე შეიძლება დასანქცირდეს“, - აღნიშნა ლევან მაჭავარიანმა.