ლევან მაჭავარიანი: საქართველოს ჰყავს არჩეული ხელისუფლება - ევრობიუროკრატები არჩევნებამდე აცხადებდნენ, რომ მათი დასაყრდენი იქნებოდა ეუთო/ოდირის საბოლოო ანგარიში. როდესაც ეს ანგარიში არ მოეწონათ, დაიწყეს ეუთო/ოდირის გაშავება და კორუმპირებული ორგანიზაცია უწოდეს

საქართველოში საპარლამენტო არჩევნებში ჩვენ ავიღეთ 1 120 000 ხმა, ჩვენი მოსახლეობის უმრავლესობა გვერდით დაგვიდგა, ეს იყო ფიზიკური და სულიერი გადარჩენის არჩევნები. ჩვენი ამომრჩევლის თითქმის, იგივე რაოდენობა მოვიდა თვითმმართველობის არჩევნებზეც, რაც არის სერიოზული გამონაკლისი არა მხოლოდ საქართველოში, არამედ ნებისმიერ ქვეყანაში, შესაბამისად, ეს არჩევნები იყო შემდგარი, - განაცხადა გადაცემაში „ღია ეთერი“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა.

ლევან მაჭავარიანმა აღნიშნა, რომ საქართველოს ჰყავს არჩეული ხელისუფლება.

„ეუთო/ოდირის საბოლოო ანგარიშში მკაფიოდ წერია, რომ არჩევნები ჩატარდა საქართველოში, რომელიც იყო კონკურენტული, სადაც ყველა საარჩევნო სუბიექტს ჰქონდა თავისუფალ გარემოში საარჩევნო კამპანიის წარმოების საშუალება.

ის ევრობიუროკრატები, რომლებიც არჩევნების შემდეგ ეუთო/ოდირის გაშავების კამპანიაში იყვნენ ჩართული, არჩევნებამდე აცხადებდნენ, რომ მათი დასაყრდენი იქნებოდა ეუთო/ოდირის საბოლოო ანგარიში. როდესაც ეს ანგარიში არ მოეწონათ, დაიწყეს ეუთო/ოდირის გაშავება და უწოდეს კორუმპირებული ორგანიზაცია და თითქოს „ქართულმა ოცნებამ“ მოისყიდა“, - აღნიშნა ლევან მაჭავარიანმა.