ლევან მახაშვილი: იმედი მაქვს, ბრიუსელის ბიუროკრატები გადაიაზრებენ, რომ მათი პოლიტიკა არის დიალოგის მაგიდის აყირავების პოლიტიკა, რაც არ შეესაბამება მათსავე ინტერესებს

საქართველოსთან დაკავშირებით კაია კალასის მიერ გაკეთებულ განცხადებას, ევროპასთან ინტეგრაციის კომიტეტის თავმჯდომარე, ლევან მახაშვილი გამოეხმაურა. მან იმედი გამოთქვა, რომ ბრიუსელი საკუთარ პოლიტიკას გადაიაზრებს და მხარეები დიალოგს დაუბრუნდებიან.

„ნამდვილად დასანანია, რომ საქართველოს მხრიდან გაწვდილ ხელს - სრულიად ჯანსაღ პარტნიორულ დამოკიდებულებას ბრიუსელის მაღალჩინოსნები ამ ტიპის განცხადებებს ახვედრებენ. გავაგრძელებთ ჩვენ პოლიტიკას, ჩვენს სახელმწიფოზე და ინტერესებზე ორიენტირებულ პოლიტიკას და იმედი მაქვს, რომ რაღაც მომენტში, მათ შორის, ბრიუსელის ბიუროკრატები გადაიაზრებენ, რომ მათი პოლიტიკა არის დიალოგის მაგიდის აყირავების პოლიტიკა, რაც არ შეესაბამება მათსავე ინტერესებს და ჩვენ გვექნება შესაძლებლობა, რომ უახლოეს მომავალში დავუბრუნდეთ დიალოგის რეჟიმს“, - განაცხადა მახაშვილმა.

ბრიუსელში, ევროკავშირის საგარეო საქმეთა მინისტრების შეხვედრამდე, კაია კალასმა საქართველოსთან დაკავშირებით განცხადება გააკეთა. მან თქვა, რომ არ სურთ მთავრობის მხარდაჭერა და სურთ მხარი დაუჭირონ ქართველ ხალხს.