ლევან მახაშვილი იუკნევიჩიენეს ანგარიშზე: ჩანს რეალურად ვინ არის დიალოგის ხელის შემშლელი. ღიმილისმომგვრელია, როდესაც ერთი ხელით მოგიწოდებენ მედია თავისუფლებაზე, დემოკრატიაზე და მეორე ხელით თავად ცდილობენ მოგუდონ თავისუფალი ხმა

ღიმილისმომგვრელია, როდესაც ერთი ხელით მოგიწოდებენ მედია თავისუფლებაზე, დემოკრატიაზე და მეორე ხელით თავად ცდილობენ მოგუდონ მართლაც თავისუფალი ხმა, - ასე ეხმაურება პარლამენტის ევროპასთან ინტეგრაციის კომიტეტის თავმჯდომარე ლევან მახაშვილი რასა იუკნევიჩიენეს ანგარიშის პროექტს, რომელსაც ევროპარლამენტის საგარეო კომიტეტმა მხარი დაუჭირა.

მისი თქმით, ამ გადაწყვეტილებამ აჩვენა, თუ რეალურად ვინ უშლის ხელს დიალოგს.

„ევროპარლამენტმა ყველაფერს დაარქვა საბოლოოდ თავისი სახელი. ვგულისხმობ იმას, რომ დღეს ჩანს რეალურად ვინ არის დიალოგის ხელის შემშლელი, პარტნიორობის ხელის შემშლელი. ეს არის სწორედ ევროპარლამენტი და მისი პოლიტიკური ძალები, რომლებიც ათასი უმისამართო ბრალდებებით ცდილობენ ამ ურთიერთობების ჩაშლას. მითუმეტეს ღიმილისმომგვრელია ამ ტიპის განცხადებები, როდესაც ერთი ხელით მოგიწოდებენ მედია თავისუფლებაზე, დემოკრატიაზე და ა.შ. და მეორე ხელით თავად ცდილობენ მოგუდონ მართლაც თავისუფალი ხმა“, - განაცხადა ლევან მახაშვილმა.

ევროპარლამენტის საგარეო კომიტეტმა მხარი დაუჭირა რასა იუკნევიჩიენეს ანგარიშის პროექტს და შესწორებებს. დოკუმენტი, სავარაუდოდ, 18-21 მაისის პლენარული სხდომის დღის წესრიგში შევა. რასა იუკნევიჩიენე ამტკიცებს, რომ საქართველო კანდიდატი ქვეყნის კრიტერიუმებს ვერ აკმაყოფილებს და პერსონალურ სანქციებს ითხოვს. ასევე, შესწორებებით მოთხოვნილია სამი დამოუკიდებელი ტელეკომპანიის სანქცირება.