ლევან მახაშვილი: მნიშვნელოვან მოვლენას ვაკვირდებით. ვხედავთ არსებითად შეცვლილ რიტორიკას, კადრებსაც. რაც ერთი წლის წინ წარმოუდგენლად მიგვაჩნდა, დღეს ვხედავთ, რომ რეალობაა - ვგულისხმობ უკრაინის პრეზიდენტის ინიციატივებს

მნიშვნელოვან მოვლენას ვაკვირდებით. ჩვენ ვხედავთ არსებითად შეცვლილ რიტორიკასაც, კადრებსაც. რაც შეიძლება ერთი წლის წინ სრულიად წარმოუდგენლად მიგვაჩნდა, დღეს ვხედავთ, რომ რეალობაა - ვგულისხმობ უკრაინის პრეზიდენტის მხრიდან ინიციატივებს და ა.შ., - განაცხადა პარლამენტის ევროპასთან ინტეგრაციის კომიტეტის თავმჯდომარემ ლევან მახაშვილმა.

მისი თქმით, ევროპული პოლიტიკური გაერთიანების სამიტის ფარგლებში გამოიკვეთა, რომ საქართველოს მიმართ ინტერესი გაათმაგებულია.

„შეგვიძლია ორ მიზნად შევაჯამოთ ჩვენი დელეგაციის მიზანი ამ გაერთიანებაში მონაწილეობის. პირველი არის პოლიტიკური კომუნიკაცია უმაღლეს დონეზე და ჩვენი პოზიციების კიდევ ერთხელ გაცნობა. შეჯამება წინა კომუნიკაციებიდან დღემდე გადადგმული ნაბიჯების, შემდგომი მოლოდინების და ამ მხრივ საკმაოდ მდიდარი იყო ეს ნახევარი დღე ამ მიმართულებით. და მეორე, ეს არის დაკავშირებადობის საკითხი. საქართველოს მნიშვნელობა ევროპისა და აზიის დაკავშირებადობის ნაწილში ერთიათად არის გაზრდილი ბოლო პერიოდის გეოპოლიტიკური ქაოსის და ცვლილებების ფონზე და რა თქმა უნდა ჩვენი მიზანიც არის, რომ გამოვიყენოთ ეს შესაძლებლობა. პრემიერ-მინისტრის მიზანიც ეს არის, რომ წინ წაწიოს საქართველოს ინტერესები, საქართველოს როლი ამ პროცესში, რომ უფრო მეტი ინვესტიცია შემოვიდეს და ჩვენი მოსახლეობის კეთილდღეობაზე აისახოს. ძალიან საინტერესო კომუნიკაცია იყო ბევრ ლიდერთან. განსაკუთრებით გამოსაყოფია უკრაინის პრეზიდენტთან კომუნიკაცია. მათი ინიციატივით შემდგარი კომუნიკაცია“, - განაცხადა ლევან მახაშვილმა.

მისი თქმით, თუკი უკრაინის პრეზიდენტი გადახედავს მის უსამართლო დამოკიდებულებას საქართველოს მიმართ, რომელიც მათ შორის ელჩის გაწვევას უკავშირდებოდა, რა თქმა უნდა ჩვენი ქვეყანა გააგრძელებს თანამშრომლობის და მეგობრობის ფორმატში უკრაინასთან ურთიერთობას.

საქართველოს პრემიერ-მინისტრი ირაკლი კობახიძე ევროპული პოლიტიკური გაერთიანების (EPC) მე-8 სამიტში მონაწილეობს. ღონისძიების ფარგლებში, უკრაინის პრეზიდენტ ვოლოდიმირ ზელენსკის შეხვდა. შეხვედრაზე, რომელიც უკრაინული მხარის ინიციატივით გაიმართა, საუბარი ორი ქვეყნის ურთიერთობებს შეეხო.