ლევან მახაშვილი: საპარლამენტო დელეგაციის ვიზიტი ჩინეთში არის ერთ-ერთი უიშვიათესი შემთხვევა ჩვენს საპარლამენტო ისტორიაშიც და ზოგადად, მსოფლიო ისტორიაშიც. უნდა ველოდოთ კარგ ამბებს ურთიერთობების გაღრმავების კვალდაკვალ

საპარლამენტო დელეგაციის ვიზიტი ჩინეთში არის ერთ-ერთი უიშვიათესი შემთხვევა ჩვენს საპარლამენტო ისტორიაშიც და ზოგადად, მსოფლიო ისტორიაშიც. უნდა ველოდოთ კარგ ამბებს ურთიერთობების გაღრმავების კვალდაკვალ, - განაცხადა „დღის ქრონიკასთან“ პარლამენტის ევროპასთან ინტეგრაციის კომიტეტის თავმჯდომარემ ლევან მახაშვილმა.

წამყვანმა ჰკითხა, ელის თუ არა ხელისუფლება სიახლეს ჩინეთში საპარლამენტო დელეგაციის ვიზიტის შემდეგ, რომელსაც პარლამენტის თავმჯდომარე ხელმძღვანელობს.

„პარლამენტის თავმჯდომარის ვიზიტი ზოგადად, ჩინეთთან ურთიერთობის დაახლოების კონტექსტში უნდა განვიხილოთ. როდესაც შუა დერეფანზე ვსაუბრობთ, თუ არ გვაქვს ერთი, ან მეორე მხარე, რომლებიც შუა დერეფანს დატვირთავენ, ცარიელი სიტყვები იქნება ამაზე საუბარი და ცარიელი კონცეფცია შუა დერეფანი. ვაღრმავებთ ურთიერთობებს სწორედ იმიტომ, რაც ვითარდება ინფრასტრუქტურა ენერგეტიკის, რკინიგზის, საჰაერო, თუ ა.შ., გამოყენებული და დატვირთული იყოს - ჩინეთიდან წამოვიდეს საქონელი, რომელიც წავა ევროპისკენ და - პირიქით. ამ მხრივ საპარლამენტო დელეგაციის ვიზიტი ჩინეთში არის ერთ-ერთი უიშვიათესი შემთხვევა ჩვენს საპარლამენტო ისტორიაშიც და ზოგადად, მსოფლიო ისტორიაშიც. უნდა ველოდოთ კარგ ამბებს ურთიერთობების გაღრმავების კვალდაკვალ“, - აღნიშნა მახაშვილმა.

ბოლო 20 წელიწადში პირველად, საქართველოს პარლამენტის თავმჯდომარე, ჩინეთის სახალხო კონგრესის თავმჯდომარის მიწვევით, ჩინეთში პირველი ოფიციალური ვიზიტით იმყოფება.