ლიეტუვაში მეტეოროლოგიური აეროსტატი დრონი ეგონათ, რის გამოც განგაში გამოაცხადეს

ლიეტუვის დედაქალაქ ვილნიუსში საჰაერო სივრცეში დრონის მოსალოდნელი შეჭრის გამო დილიდან განგაში იყო გამოცხადებული. ინფორმაციას ლიეტუვური მედია ავრცელებს.

მედიის ცნობით, განგაშის დროს ნატოს სამხედრო თვითმფრინავები აფრინდნენ და საჰაერო სივრცის პატრულირება დაიწყეს.

მოგვიანებით განგაში გაუქმდა, რადგან გაირკვა, რომ ლიეტუვის საჰაერო სივრცეში არა დრონი, არამედ მეტეოროლოგიური აეროსტატი შეიჭრა. წინასწარი ინფორმაციით, აეროსტატი ბელარუსიდან შევიდა.

„ობიექტის იდენტიფიცირება მოხდა, როგორც სავარაუდო მეტეოროლოგიური აეროსტატი, ამიტომაც ადგილობრივ მცხოვრებლებს დაეგზავნათ შეტყობინება, რომ საჰაერო განგაში გაუქმებულია. თუმცა რეკომენდებულია, რომ ისინი ფხიზლად იყვნენ, რადგან მსგავსი ობიექტები, შესაძლოა, მომავალშიც გამოჩნდნენ“, - ციტირებს მედია ლიეტუვის კრიზისული მართვის ეროვნული ცენტრის ხელმძღვანელს ვილმანტას ვიტკაუსკასს.