მადიარის განცხადებით, უნგრეთში ერთნაირსქესიანი წყვილებისთვის შვილად აყვანაზე დაწესებული აკრძალვა გაუქმდება
უნგრეთის ახალი პრემიერ-მინისტრის, პეტერ მადიარის განცხადებით, მთავრობა შეცვლის ვიქტორ ორბანის ყოფილი ხელისუფლების მიერ 2020 წელს მიღებულ კანონმდებლობას, რომელმაც ერთნაირსქესიანთა მიერ ბავშვის შვილად აყვანა ფაქტობრივად აკრძალა.
ევროკავშირის წევრ უნგრეთში ერთნაირსქესიანი წყვილების მიერ ბავშვის შვილად აყვანა 2020 წლის ბოლომდე იყო შესაძლებელი, თუკი ერთ-ერთი პარტნიორი განაცხადს მარტოხელა პირის სტატუსით შეიტანდა.
2020 წელს ორბანის მემარჯვენე პარტია „ფიდესის“ მიერ მიღებული კანონის თანახმად, მარტოხელა პირებს შვილად აყვანის განაცხადი საოჯახო საქმეთა მინისტრისთვის უნდა დაემტკიცებინათ, რაც, ფაქტობრივად, პრაქტიკის სრულ აკრძალვას ნიშნავდა.
Reuters-ი წერს, რომ შვილად აყვანის სისტემის შეცვლა ლგბტქ+ უფლებების აღდგენისკენ გადადგმული მნიშვნელოვანი ნაბიჯი იქნება.
„ცალსახად შეგვიძლია, განვაცხადოთ, რომ ჩვენ ამ სისტემას შევცვლით: ასეთ შემთხვევებში გადაწყვეტილებას მინისტრი ან პოლიტიკოსი კი არა, პროფესიონალები უნდა იღებდნენ, რომლებსაც შეუძლიათ განსაზღვრონ ის პირობები, რომლებშიც კონკრეტული ბავშვი შეძლებს გახდეს საზოგადოების ბედნიერი და ჰარმონიული წევრი“, - განუცხადა მადიარმა ჟურნალისტებს.
ევროპის მართლმსაჯულების სასამართლომ უშუალოდ არჩევნების წინ, აპრილში დაადგინა, რომ ორბანის მთავრობამ ევროპული სამართალი დაარღვია იმ წესებით, რომლებიც კრძალავდა ან ზღუდავდა ლგბტქ+ კონტენტზე წვდომას.
უნგრეთში ერთნაირსქესიანთა ქორწინება არასდროს ყოფილა დაშვებული, თუმცა ქვეყანა სამოქალაქო პარტნიორობას აღიარებს.
იმედი
წყარო: imedinews.ge