მაია ბითაძე კანდელაკის „კვლევაზე“: ნათლად ვხედავთ, თუ როგორ ისტერიკაშია „ნაციონალური მოძრაობა“ იმის ფონზე, რომ ქართულ-ამერიკული ურთიერთობები ნორმალიზდება
ნათლად ვხედავთ, თუ როგორ ისტერიკაშია „ნაციონალური მოძრაობა“ იმის ფონზე, რომ ქართულ-ამერიკული ურთიერთობები ნორმალიზდება, - ასე აფასებს გარემოს დაცვისა და ბუნებრივი რესურსების საპარლამენტო კომიტეტის თავმჯდომარე მაია ბითაძე ოპოზიციონერ გიორგი კანდელაკის „კვლევაზე“ დაყრდნობით გამოცემულ სტატიას, სადაც ამერიკული მედიასაშუალება საქართველოს ტერორისტული ოპერაციების ცენტრად მოიხსენიებს.
ბითაძის თქმით, არსებულ გეოპოლიტიკურ ვითარებაში მსგავს კონტექსტში საქართველოსა და ირანის ურთიერთობაზე საუბარი ნათლად აჩვენებს, რომ რადიკალები ყველაფერზე წამსვლელები არიან.
„იმ ფონზე, როდესაც საქართველოსა და ირანს შორის 0-დან 1%-მდეა ექსპორტ-იმპორტი, სასაცილოც კია იმაზე საუბარი, რომ რაიმე ირანული გავლენა შეიძლება იყოს საქართველოზე. განსაკუთრებით საყურადღებოა, როდესაც ირანზე ამ კონტექსტში საუბრობს, ამ რთულ გეოპოლიტიკურ ვითარებაში, რაც პირდაპირ მიუთითებს, რომ არაფერზე არიან უკან დამხევები“, - განაცხადა მაია ბითაძემ.
„ქართული ოცნების“ ხელმძღვანელობით, თბილისი ირანელი რეკრუტირებისა და ტერორისტული ოპერაციების ნაყოფიერ ნიადაგად იქცა, - ამ სათაურით აქვეყნებს ამერიკული გამოცემა The Washington Free Beacon სტატიას, რომლის ავტორი, ადამ კრედო, ოპოზიციის მხარდამჭერების - ჯო უილსონისა და ლუკ კოფის გარდა, ოპოზიციონერ გიორგი კანდელაკის განცხადებებსაც ეყრდნობა.
კანდელაკი აცხადებს, რომ ალ-მუსტაფას, რომელიც დონალდ ტრამპმა 2020 წელს ტერორისტულ ორგანიზაციად გამოაცხადა, საქართველოში უნივერსიტეტის სამი კამპუსი აქვს.
