მაკრონმა ზელენსკის წერილს პუტინისადმი „კარგი ინიციატივა“ უწოდა და რუსეთთან პირდაპირ მოლაპარაკებებს მხარი დაუჭირა

საფრანგეთის პრეზიდენტი, ემანუელ მაკრონი მიესალმება უკრაინის პრეზიდენტის, ვოლოდიმირ ზელენსკის ინიციატივას ვლადიმირ პუტინისთვის წერილის გაგზავნის თაობაზე და უკრაინასა და კრემლს შორის პირდაპირი მოლაპარაკებებისკენ მოუწოდა.

ამის შესახებ, როგორც უკრაინული მედია იუწყება, მაკრონმა „ევროკავშირი - დასავლეთ ბალკანეთის“ სამიტის კულუარებში განაცხადა, რომელიც მონტენეგროში დღეს იმართება. მაკრონმა პოზიტიურად შეაფასა ზელენსკის წერილი პუტინისადმი და კრემლთან პირდაპირი მოლაპარაკებებისკენ მოუწოდა.

„მიმაჩნია, რომ ეს კარგი ინიციატივაა და კარგია, რომ დისკუსიები შეიძლება განახლდეს“, - განაცხადა მაკრონმა უკრაინის პრეზიდენტის ღია წერილის კომენტირებისას.

მან შეახსენა ყველას, რომ სწორედ ევროპელები არიან „უკრაინის სამხედრო ძალისხმევის უმსხვილესი დონორები“ და, შესაბამისად, ისინი გარკვეულ მომენტში სამშვიდობო გეგმის გარშემო მოლაპარაკებების მაგიდასთან უნდა დასხდნენ, „რადგან გეოგრაფიის გათვალისწინებით, საქმე ეხება ევროპელებისთვის მშვიდობისა და უსაფრთხოების არქიტექტურას“.

„ჩვენ ყოველთვის უკრაინასა და კრემლს შორის პირდაპირი მოლაპარაკებების მომხრენი ვიყავით. თქვენთან გულახდილი ვიქნები: მიმაჩნია, რომ დღეს სწორედ უკრაინასა და რუსეთს შეუძლიათ შეიმუშაონ როგორც ცეცხლის შეწყვეტის, ისე სამშვიდობო გეგმა“, - დასძინა მაკრონმა.