მამუკა მდინარაძე: 2011 წლის 26 მაისის მაგალითზე, ამ ცუდი ისტორიიდან გამომდინარე, ყველა მოქალაქე ყოველთვის გაათვითცნობიერებს, სისხლის კვალი არ არის აუცილებელი, რომ იზეიმო დამოუკიდებლობის დღე, ეს მძიმე წარსულია, რომელიც ჩვენს ქვეყანაში არასდროს უნდა განმეორდეს

2011 წლის 26 მაისის მაგალითზე, ამ ცუდი ისტორიიდან გამომდინარე, ყველა მოქალაქე ყოველთვის გაათვითცნობიერებს, რომ სისხლის კვალი არ არის აუცილებელი იმისათვის, რომ იზეიმო დამოუკიდებლობის დღე, - განუცხადა საქართველოს ვიცე-პრემიერმა, სახელმწიფო მინისტრმა სამართალდამცავი ორგანოების კოორდინაციის საკითხებში მამუკა მდინარაძემ ჟურნალისტებს.

მისი თქმით, ეს არის მძიმე წარსული, რომელიც საქართველოში არასდროს უნდა განმეორდეს.

„ადამიანებზე გადავლით, ადამიანების დახოცვით არ უნდა უზრუნველყო მერე მოჩვენებითი ზეიმი. ჯერ ადამიანს უნდა სცე პატივი იმიტომ, რომ ის დამოუკიდებლობა გინდა ადამიანისთვის. ეს უნდა გაითავისოს ყველა ხელისუფალმა და შემდეგ უნდა გააკეთო ყველაფერი დანარჩენი, როდესაც ადამიანზე გექნება სწორება. შესაბამისად, რთული და მძიმე გასახსენებელია. ეს არის მძიმე წარსული, რომელიც ჩვენს ქვეყანაში არასდროს უნდა განმეორდეს“, - განაცხადა მამუკა მდინარაძემ.