მასწავლებელთა პროფესიული განვითარების ეროვნული ცენტრის დირექტორმა უცხოენოვანი მოხალისე მასწავლებლები დააჯილდოვა

მასწავლებელთა პროფესიული განვითარების ეროვნული ცენტრის დირექტორმა, ეკატერინე ხუციშვილმა, „ასწავლე საქართველოსთვის“ პროგრამის უცხოენოვან მოხალისე მასწავლებლებს სერტიფიკატები და სამახსოვრო საჩუქრები გადასცა.

დაჯილდოება პროგრამის „უცხოური ენების განვითარების და მხარდაჭერის“ მიმართულების 2025-2026 სასწავლო წლის შემაჯამებელი ღონისძიების ფარგლებში გაიმართა.

ღონისძიებაზე ასევე დაჯილდოვდნენ იმ სკოლების მასწავლებლები, მოსწავლეები და დირექტორები, რომლებმაც მნიშვნელოვანი წვლილი შეიტანეს უცხოური ენების სწავლების ხელშეწყობის, კულტურათაშორისი დიალოგის გაძლიერებისა და მულტილინგვური საგანმანათლებლო გარემოს ფორმირების პროცესში.

შეხვედრის მონაწილეებმა წარადგინეს პროგრამის ფარგლებში განხორციელებული საქმიანობის შემაჯამებელი პრეზენტაციები, აუდიტორიას გაუზიარეს საკუთარი გამოცდილება და მიღწეული შედეგები. ასევე გაიმართა პროგრამის შედეგად შექმნილი საგანმანათლებლო რესურსების წარდგენა.

2025-2026 სასწავლო წელს „ასწავლე საქართველოსთვის“ პროგრამის ფარგლებში მასწავლებელთა პროფესიული განვითარების ეროვნული ცენტრი თანამშრომლობდა ფრანგულ, ინგლისურ, გერმანულ, იტალიურ და ჩინურენოვან უცხოელ მოწვეულ მასწავლებლებთან.

უცხოენოვანი მოხალისე მასწავლებლები, სასწავლო წლის განმავლობაში განაწილებულნი იყვნენ საქართველოს 7 რეგიონის 30-მდე საჯარო სკოლაში, სადაც უცხოური ენის ადგილობრივ მასწავლებლებთან და თემთან თანამშრომლობით განახორციელეს სხვადასხვა ინტერკულტურული, საგანმანათლებლო, შემეცნებითი და სოციალური პროექტი.

მოხალისე მასწავლებლები ჩართულნი იყვნენ ცენტრის მიერ დაგეგმილ აქტივობებში, ზრუნავდნენ ადგილობრივი უცხოური ენის მასწავლებლების უწყვეტ პროფესიულ განვითარებაზე და ხელს უწყობდნენ სკოლებში თანამშრომლობითი კულტურის განვითარებას.

ინფორმაციას მასწავლებელთა პროფესიული განვითარების ეროვნული ცენტრი ავრცელებს.