მედია: ფიცო მოსკოვში ვიზიტისას პუტინს ზელენსკის გზავნილს გადასცემს

სლოვაკეთის პრემიერ-მინისტრი, რობერტ ფიცო, რომელიც 9 მაისს მოსკოვში ჩავა, რუსეთის პრეზიდენტს, ვლადიმერ პუტინს უკრაინის ლიდერის, ვოლოდიმირ ზელენსკის გზავნილს გადასცემს. ინფორმაციას სლოვაკური მედია ქვეყნის საგარეო საქმეთა სამინისტროს სახელმწიფო მდივანზე, რასტისლავ ხოვანეცზე დაყრდნობით ავრცელებს.

როგორც სლოვაკეთის საგარეო საქმეთა სამინისტროს წარმომადგენელმა განაცხადა, ფიცომ, შესაძლოა, პუტინისგან „ძვირფასი ინფორმაცია“ მიიღოს იმის თაობაზე, თუ როგორ დასრულდეს ომი.

„ვფიქრობ, რომ ამ დროს კონფლიქტში მონაწილე ყველა მხარესთან საუბარია საჭირო და ევროკავშირი და ევროპელი პოლიტიკოსები უნდა ფიქრობდნენ იმაზე, რომ მიუსხდნენ მოლაპარაკებების მაგიდას, სადაც სამშვიდობო შეთანხმება გაფორმდება“, - განაცხადა მან.

ხოვანეცის თქმით, რამდენიმე ევროპელმა ლიდერმა, მათ შორის დასავლეთ ევროპიდან უკვე დაიწყო საუბარი იმაზე, რომ რუსეთის ლიდერთან მოლაპარაკებები საჭიროა.