მერცი უკრაინაზე: ჩვენ ვერ მივიღებთ ევროკავშირში ქვეყანას, რომელიც ომის მდგომარეობაში იმყოფება - ომი უნდა დასრულდეს

ზელენსკიმ წამოაყენა იდეა ევროკავშირში 2027 წლის 1-ლი იანვრისთვის გაწევრიანების შესახებ - ეს არ იმუშავებს, 2028 წლის 1-ლი იანვარიც კი არარეალურია, - განაცხადა გერმანიის კანცლერმა, ფრიდრიხ მერცმა. ინფორმაციას ამის შესახებ გერმანული გამოცემა Deutsche Welle ავრცელებს.

„ჩვენ ვერ მივიღებთ ევროკავშირში ქვეყანას, რომელიც ომის მდგომარეობაში იმყოფება. ომი უნდა დასრულდეს“, - დასძინა მერცმა.

მან ასევე შეახსენა ყველას, რომ კიევმა უნდა შეასრულოს გაწევრიანების პირობები, მაგალითად, უზრუნველყოს კანონის უზენაესობა და დაძლიოს კორუფცია.

ამავდროულად, მერცი მიიჩნევს, რომ ევროკავშირმა უკრაინას გარკვეული ალტერნატივა უნდა შესთავაზოს. კანცლერის თქმით, მან ევროკავშირის სამიტზე წარადგინა იდეები კიევისა და ბრიუსელის ეტაპობრივი დაახლოების შესახებ, რამაც ფართო მხარდაჭერა მოიპოვა. მაგალითის სახით მერცმა მოიყვანა შესაძლებლობა, რომლის მიხედვითაც უკრაინამ შეიძლება მიიღოს წარმომადგენლის პოსტი ევროკომისიაში ან დეპუტატების ადგილები ევროპარლამენტში ხმის უფლების გარეშე.

უკრაინის პრეზიდენტმა, ვოლოდიმირ ზელენსკიმ მანამდე განაცხადა, რომ უკრაინა ყველაფერს გააკეთებს იმისათვის, რომ 2027 წლისთვის ევროკავშირში გასაწევრიანებლად მზად იყოს.