NBC News: აშშ-ის საიდუმლო სამსახურის ინფორმაციით, ვაშინგტონში, თეთრი სახლის სიახლოვეს, სროლა მოხდა

აშშ-ის საიდუმლო სამსახურის ინფორმაციით, ვაშინგტონში, თეთრი სახლის სიახლოვეს, სროლა მოხდა, რომელშიც უწყების პოლიციელები მონაწილეობდნენ. ინფორმაციას ამის შესახებ NBC News-ი ავრცელებს.

„აშშ-ის საიდუმლო სამსახურის პერსონალი იმყოფება ვაშინგტონში, მე-15 ქუჩისა და ინდეპენდენსის გამზირის კვეთაზე, სადაც ადგილი ჰქონდა სროლას სამართალდამცველების მონაწილეობით. ერთი პირი დაჭრილია სამართალდამცველი ორგანოს წარმომადგენლის მიერ. მისი მდგომარეობა ამ დროისთვის უცნობია“, - ნათქვამია საიდუმლო სამსახურის მიერ გავრცელებულ განცხადებაში. „გთხოვთ, მოერიდოთ აღნიშნულ ტერიტორიას, რადგან ადგილზე მუშაობენ საგანგებო სიტუაციების მართვის ჯგუფები“.

საიდუმლო სამსახურის ცნობით, დაჭრილი პირი საავადმყოფოშია გადაყვანილი, შემთხვევის ადგილიდან კი ამოღებულია იარაღი.

ამ ეტაპზე ბოლომდე გაურკვეველია, არის თუ არა მომხდარი პირდაპირ კავშირში თეთრ სახლთან, თუმცა ცნობილია, რომ ინციდენტი თეთრი სახლის ტერიტორიაზე არ მომხდარა. აღსანიშნავია, რომ სროლის პარალელურად, თეთრ სახლში დონალდ ტრამპის მონაწილეობით მიმდინარე ღონისძიება შეუფერხებლად გაგრძელდა.