ნეთანიაჰუ: თუ „ჰეზბოლა“ ისრაელის ჩრდილოეთზე თავდასხმებს არ შეწყვეტს, ისრაელი ბეირუთზე დარტყმების განხორციელების თავდაპირველ გეგმას შეასრულებს

ისრაელის პრემიერ-მინისტრის, ბენიამინ ნეთანიაჰუს განცხადებით, თუ ტერორისტული დაჯგუფება „ჰეზბოლა“ ისრაელის ჩრდილოეთზე თავდასხმებს არ შეწყვეტს, ისრაელი ბეირუთზე დარტყმების განხორციელების თავდაპირველ გეგმას შეასრულებს.

აღნიშნული განცხადება ნეთანიაჰუმ მას შემდეგ გააკეთა, რაც აშშ-ის პრეზიდენტმა, დონალდ ტრამპმა განაცხადა, რომ ისრაელის თავდაცვის ძალები ლიბანის დედაქალაქში არ შევლენ და ისრაელი და „ჰეზბოლა“ ერთმანეთზე თავდასხმებისგან თავს შეიკავებენ.

„ამ საღამოს ვესაუბრე პრეზიდენტ ტრამპს და ვუთხარი, რომ თუ ჰეზბოლა არ შეწყვეტს ჩვენს ქალაქებსა და მშვიდობიან მოსახლეობაზე თავდასხმას, ისრაელი ბეირუთში არსებულ ტერორისტულ სამიზნეებზე დარტყმებს განახორციელებს. ეს პოზიცია უცვლელი რჩება“, - დასძინა მან.

ამასთანავე, ისრაელის პრემიერ-მინისტრმა ხაზგასმით აღნიშნა, რომ პარალელურად, ისრაელის თავდაცვის ძალები სამხრეთ ლიბანში ოპერაციებს დაგეგმილისამებრ გააგრძელებენ.