ნიკოლ ფაშინიანი: რუსეთის ფედერაციის პრეზიდენტთან მეგობრული ურთიერთობები მაქვს. რუსეთი ზესახელმწიფოა და მას პატივი უნდა ვცეთ

სომხეთის პრემიერ-მინისტრის ნიკოლ ფაშინიანის განცხადებით, მას რუსეთის პრეზიდენტთან ვლადიმერ პუტინთან მეგობრული ურთიერთობები აქვს.

როგორც ფაშინიანმა ერთ-ერთი წინასაარჩევნო მიტინგის დროს განაცხადა, 2018 წლიდან, როცა ის მოვიდა სომხეთის ხელისუფლებაში, პუტინთან 200-მდე სატელეფონო საუბარი გამართა. სომხეთის მთავრობის თავმჯდომარის თქმით, ოფიციალური ერევანი მოსკოვთან მიმართებით მკვეთრი ნაბიჯების გადადგმას არ აპირებს.

„რუსეთის ფედერაციასთან მიმართებით ჩვენ არცერთი მკვეთრი ნაბიჯის გადადგმას არ ვაპირებთ. რუსეთის ფედერაციის პრეზიდენტთან მე მაქვს მეგობრული ურთიერთობები. მეეჭვება, რომ 2018 წლიდან დღემდე რუსეთის ფედერაციის პრეზიდენტს ვინმესთან უფრო მეტი კონტაქტი ჰქონოდა, ვიდრე ჩემთან. ამ დროის განმავლობაში ჩვენ 200-მდე სატელეფონო საუბარი გავმართეთ. ეს იმას ნიშნავს, რომ ამ რვა წლის განმავლობაში თვეში ერთხელ რუსეთის ფედერაციის პრეზიდენტთან ძალიან თბილი, მეგობრული ურთიერთობები გვქონდა“, - განაცხადა ფაშინიანმა.

მან აგრეთვე დასძინა, რომ რუსეთი ზესახელმწიფოა და მას პატივი უნდა სცენ. ფაშინიანის თქმით, სომხეთი რუსეთის ინტერესებს საკუთარ ინტერესებს მაღლა ვერ დააყენებს. მისი განმარტებით, სომხეთი რუსეთს არ დაუპირისპირდება და დიალოგი უმაღლეს დონეზე გაგრძელდება.