პაკისტანის პრემიერმა ყველა მხარეს მოუწოდა, გამოიჩინონ თავშეკავება და მშვიდობას კიდევ ერთი შანსი მისცენ

პაკისტანის პრემიერ-მინისტრმა, შაჰბაზ შარიფმა ყველა მხარეს მოუწოდა, „გამოიჩინონ თავშეკავება და მშვიდობას კიდევ ერთი შანსი მისცენ“.

პაკისტანის ლიდერის ეს განცხადება მოჰყვა ისრაელსა და ირანს შორის განხორციელებულ საპასუხო დარტყმებს, რაც აპრილის ზავის შემდეგ ვითარების ყველაზე მწვავე ესკალაციას წარმოადგენს.

„ახლო აღმოსავლეთში ძალადობის ბოლოდროინდელი ტალღა არის მკაცრი შეხსენება იმ საფრთხეებისა, რაც არამყარ ცეცხლის შეწყვეტის შეთანხმებას ახლავს თან, და იმ გაუსაძლისი შედეგებისა, რაც ამას შეიძლება მოჰყვეს“, - აღნიშნა შარიფმა.

ბოლო თვეების განმავლობაში, ისლამაბადი ახლო აღმოსავლეთის კონფლიქტში აშშ-სა და ირანს შორის საკვანძო შუამავლად იქცა და წამყვანი როლი შეასრულა აპრილში დროებითი ზავის მიღწევაში.

პაკისტანის პრემიერ-მინისტრმა მიანიშნა ვაშინგტონსა და თეირანს შორის მიმდინარე ბოლოდროინდელ მოლაპარაკებებზე, რომელთა მიზანიც ცეცხლის შეწყვეტის შეთანხმების გრძელვადიან მშვიდობად ქცევაა, და აღნიშნა, რომ „საბოლოო მიზანი თითქმის მიღწეულია“.

„იმ დროს, როდესაც ჩვენ, ჩვენს ძმებთან და პარტნიორებთან ერთად, გულმოდგინედ და თავდაუზოგავად ვმუშაობთ კონფლიქტის მშვიდობიანი, დიპლომატიური გზით მოგვარებისთვის და განსაკუთრებით ახლა, როდესაც საბოლოო მიზანი თითქმის მიღწეულია, გულწრფელად მოვუწოდებთ ყველა მხარეს, გამოიჩინონ თავშეკავება და მშვიდობას კიდევ ცოტა მეტი შანსი მისცენ“, - განაცხადა შაჰბაზ შარიფმა.

პაკისტანის პრემიერ-მინისტრმა ასევე დასძინა, რომ ძალადობისა და ნგრევის ნაცვლად, დიპლომატიას კვლავ აქვს „წარმატების პერსპექტივა“.