პაკისტანის პრემიერ-მინისტრის განცხადებით, მოსალოდნელია, რომ ირანი და აშშ სამშვიდობო შეთანხმებაზე მუშაობას უახლოეს 24 საათში დაასრულებენ, რის შემდეგაც დოკუმენტის ელექტრონული ხელმოწერის ცერემონია გაიმართება

პაკისტანის პრემიერ-მინისტრმა შაჰბაზ შარიფმა სოციალურ ქსელ X-ში დაწერა, რომ უახლოეს 24 საათში მოსალოდნელია, რომ აშშ და ირანი სამშვიდობო შეთანხმებაზე მუშაობას დაასრულებენ, რის შემდეგაც მხარეები დოკუმენტს ელექტრონულად მოაწერენ ხელს.

„ჩვენ ისე ახლოს ვართ სამშვიდობო შეთანხმებასთან, როგორც არასდროს. მოსალოდნელია, რომ შეთანხმებაზე მუშაობა საბოლოოდ უახლოეს 24 საათში დასრულდება, რის შემდეგაც პაკისტანი შეთანხმების ელექტრონულად ხელმოსაწერად მოემზადება, ხოლო მომდევნო კვირას დაიწყება მოლაპარაკებები ტექნიკურ დონეზე“, - დაწერა პაკისტანის პრემიერმა.

მან მადლობა გადაუხადა, როგორც ამერიკულ და ირანულ მხარეებს, აგრეთვე რეგიონის სხვა ქვეყნებსაც კონსტრუქციული მუშაობისთვის.

„გვსურს მადლობა გადავუხადოთ ამერიკის შეერთებულ შტატებს და ირანის ისლამურ რესპუბლიკას მოლაპარაკებების მიმართ მათი ურყევი ერთგულებისათვის. ჩვენ აგრეთვე გულწრფელ მადლობას ვეუბნებით ჩვენს ძმებს რეგიონში მათი მხარდაჭერისთვის. დარწმუნებულები ვართ, რომ აღნიშნული ისტორიული შეთანხმება გრძელვადიანი მშვიდობის ძლიერი საფუძველი გახდება“, - აღნიშნა მან.

We are closer to a peace deal than ever before. With finalisation likely expected in the next 24 hours, Pakistan is preparing for the electronic signing of the peace deal immediately after, followed by technical level talks next week. We would like to thank United States of… — Shehbaz Sharif (@CMShehbaz) June 13, 2026