პარლამენტის კომიტეტებმა ერთობლივ სხდომაზე მომხმარებელთა ინტერესების საზოგადოებრივი დამცველის სამსახურის 2025 წლის საქმიანობის ანგარიში მოისმინეს

საქართველოს პარლამენტის ადამიანის უფლებათა დაცვისა და სამოქალაქო ინტეგრაციის და ეკონომიკური პოლიტიკის კომიტეტებმა ერთობლივ სხდომაზე, კომუნიკაციების ეროვნულ კომისიასთან დამოუკიდებლად არსებული მომხმარებელთა ინტერესების საზოგადოებრივი დამცველის სამსახურის 2025 წლის საქმიანობის ანგარიში მოისმინეს.

მომხსენებლის, მომხმარებელთა ინტერესების საზოგადოებრივი დამცველის, გვანცა ჩხეიძის განცხადებით, გასულ წელსაც მომხმარებელთა მიმართვიანობის სტატისტიკა მზარდი იყო. 2025 წელს სამსახურს 3 015-მა მომხმარებელმა მიმართა საჩივრით და მათი უმეტესი ნაწილი - 2 864 საჩივარი, სამსახურის ჩარევის შედეგად, დაკმაყოფილებულია. საჩივრების უმრავლესობა შეეხებოდა: ელექტრონული საკომუნიკაციო კავშირის დაზიანებას და მომსახურების შეზღუდვას ან შეწყვეტას, ასევე უხარისხო სატელეკომუნიკაციო მომსახურებას.

ანგარიშის თანახმად, 2025 წელს, სამსახურმა 672 რეკომენდაცია გასცა, საიდანაც: ზოგადი ხასიათის რეკომენდაცია იყო 19, ინდივიდუალური ხასიათის - 460, ხოლო 193 რეკომენდაცია იყო მონიტორინგის ფარგლებში გაცემული.

მომხსენებელმა ასევე ისაუბრა: 2025 წელს სამსახურის მიერ განხორციელებულ მნიშვნელოვან აქტივობებზე, მომხმარებელთა ცნობიერების ამაღლებაზე, სამსახურის მიერ ელექტრონულ რესურსზე გამოქვეყნებულ სხვადასხვა ინფორმაციასა და სხვა საკითხებზე.