პარლამენტმა „საავტომობილო გზების შესახებ“ კანონში ცვლილებები მიიღო

პარლამენტმა მესამე მოსმენით, დაჩქარებული წესით განიხილა და მხარი დაუჭირა „საავტომობილო გზების შესახებ“ კანონში ცვლილებებს, რომელიც პლენარულ სხდომაზე ინფრასტრუქტურის მინისტრის მოადგილემ, მზია გიორგობიანმა წარადგინა.

კანონპროექტის თანახმად, საქართველოს ინფრასტრუქტურის სამინისტროს ენიჭება უფლებამოსილება, საერთაშორისო და შიდასახელმწიფოებრივი მნიშვნელობის საავტომობილო გზების მოვლა-შენახვის მოვალეობის შესრულება სრულად ან ნაწილობრივ გადასცეს მის მართვაში არსებულ კერძო სამართლის იურიდიულ პირს. სახელმწიფო კომპანია საავტომობილო გზების მოვლა/შენახვას გორი-არგვეთას 105-კილომეტრიან მონაკვეთზე არსებულ ინფრასტრუქტურულ ობიექტებზე - 138 ხიდსა და 59 გვირაბზე განახორციელებს.

ცვლილებებით ასევე განისაზღვრება, რომ საავტომობილო გზებთან დაკავშირებული ცალკეული ვალდებულებების შეუსრულებლობა პასუხისმგებლობას გამოიწვევს „საქართველოს ადმინისტრაციულ სამართალდარღვევათა კოდექსით“ დადგენილი წესით.