პეტერ მადიარი: თუ უკრაინა დადგენილ ვადებში არ შეასრულებს თავის ვალდებულებებს უნგრული უმცირესობის უფლებებთან დაკავშირებით, იგი ვერ შეძლებს წინ სვლას ევროკავშირში გაწევრიანების პროცესში

უნგრეთის პრემიერ-მინისტრმა, პეტერ მადიარმა განმარტა, რომ უკრაინისთვის პირველი კლასტერის გახსნას მხარი მას შემდეგ დაუჭირა, რაც კიევმა ეროვნულ უმცირესობათა დაცვის გეგმაში ცვლილებები ევროკავშირის წევრ ქვეყნებთან შეთანხმებული რედაქციით შეიტანა.

მადიარმა აღნიშნა, რომ მისმა მთავრობამ რამდენიმე კვირაში შეძლო იმის მოგვარება, რაც მისმა წინამორბედმა, ვიქტორ ორბანმა ათი წლის განმავლობაში ვერ შეძლო, და უნგრული უმცირესობის უფლებები ახლა გარანტირებულია. იგი ამ შეთანხმებას ისტორიულს უწოდებს.

მან ასევე დაარწმუნა საზოგადოება, რომ ბუდაპეშტმა ევროკავშირისგან მიიღო გარანტიები იმ ორმხრივი შეთანხმების შესრულებაზე, რომელიც ზაკარპატიის უნგრელების უფლებებს არეგულირებს.

„უკრაინულმა მხარემ ოფიციალურად აიღო ვალდებულება, შეასრულოს ყველა პუნქტი და ეს შეთანხმება უმცირესობათა საკითხებზე ევროკავშირის სამოქმედო გეგმაში ჩართო“, - ნათქვამია მადიარის განცხადებაში.

მისი თქმით, ეს ნიშნავს, რომ უნგრეთ-უკრაინის იმ შეთანხმებით გათვალისწინებული ვალდებულებების შესრულება, რომელიც უმცირესობათა უფლებებს ეხება და ზაკარპატიის უნგრული უმცირესობის უფლებების მოწესრიგებისკენაა მიმართული, ამიერიდან ევროკავშირის მოთხოვნაც გახდა. როგორც მადიარმა აღნიშნა, ამ ვალდებულებების შესრულებას მომავალში მუდმივად გააკონტროლებენ ევროკომისია და ევროპული საბჭო.

„თუ უკრაინა დადგენილ ვადებში არ შეასრულებს თავის ვალდებულებებს უნგრული უმცირესობის უფლებებთან დაკავშირებით, იგი ვერ შეძლებს წინ სვლას ევროკავშირში გაწევრიანების პროცესში“, - განაცხადა მადიარმა.

მისი თქმით, მიღწეული შეთანხმებები გახდა წინაპირობა იმისა, რომ უნგრეთმა თანხმობა განაცხადა უკრაინასა და ევროკავშირს შორის პირველი კლასტერის გახსნაზე.

ამავდროულად, მადიარმა შეახსენა საზოგადოებას, რომ პირველი კლასტერის გახსნა მხოლოდ პირველი ნაბიჯია ხანგრძლივ და რთულ პროცესში.