პეტრე მამრაძე: პეტერ ფიშერი განსაკუთრებული შემთხვევაა და მახსოვს, როდესაც ჩამოვიდა ელჩად, ერთი თვე იქნებოდა გასული, როცა გერმანიის საელჩოდან მოდიოდა ინფორმაცია, რომ ეს ადამიანი არანაირად არ ჯდება დიპლომატის ჩარჩოებში. შემდეგ გაირკვა, რომ მამუკა ხაზარაძის სახლში ცხოვრობს, დადის მისი მანქანით და ფულს საერთოდ არ იხდის

ძალიან კარგად მახსოვს, გერმანელი ელჩები რომ ჩამოდიოდნენ 90-იანი წლებიდან, ხაზგასმით აღნიშნავდნენ, რომ ქართველების ტოლერანტობა არის სანიმუშო, - განაცხადა გადაცემაში „EURO ანატომია“ პარტია „ერთიანი ნეიტრალური საქართველოს“ წევრმა პეტრე მამრაძემ.

მან გერმანიის ამჟამინდელი ელჩის პეტერ ფიშერის განცხადებაც შეაფასა. როგორც ცნობილია, ფიშერი აცხადებს, რომ მისი ინფორმაციით, „ქართველ ხალხს არ სურს იყოს თურქი, რუსი, ირანელი ან აზერბაიჯანელი“. მამრაძის განცხადებით, ელჩის ეს განცხადება არაადეკვატური და ქსენოფობიურია.

„ადამიანს არ სურს იყოს ის, რაც არ არის, ეს გასაგებია. პეტერ ფიშერი განსაკუთრებული შემთხვევაა და მახსოვს, როდესაც ჩამოვიდა ელჩად, ერთი თვე იქნებოდა გასული, როცა გერმანიის საელჩოდან მოდიოდა ინფორმაცია, რომ ეს ადამიანი არანაირად არ ჯდება დიპლომატის ჩარჩოებში. შემდეგ გაირკვა, რომ მამუკა ხაზარაძის სახლში ცხოვრობს, დადის მისი მანქანით, ფულს არ იხდის საერთოდ. მისთვის დიპლომატიური ნორმები და ეთიკა აშკარად არ არსებობს. წინა ელჩი სულ სიმართლის მხარეს იყო და ეს კი ნაწილი გახდა ამ რადიკალური ოპოზიციის.

ჯერ კიდევ 2024 წლის არჩევნებამდე უკვე გამოცხადებული იყო მაკკეინის ინსტიტუტის პროგრამა, რომ ევროპელმა ლიდერებმა მაშინვე უნდა გამოაცხადონ, რომ არჩევნები გაყალბებულია და შესაბამისი პოლიტიკა განახორციელონ“, - აღნიშნა პეტრე მამრაძემ.