ფინანსთა მინისტრი აზიის ინფრასტრუქტურის საინვესტიციო ბანკის (AIIB) პრეზიდენტს შეხვდა

საქართველოს ფინანსთა მინისტრი ლაშა ხუციშვილი, აზიის ინფრასტრუქტურის საინვესტიციო ბანკის (AIIB) მე-11 წლიური შეხვედრის ფარგლებში, შეხვდა ბანკის პრეზიდენტ ძოუ ჯიაის (Zou Jiayi), რომელმაც აღნიშნული თანამდებობა 5 წლის ვადით მიმდინარე წლის იანვარში დაიკავა. ინფორმაციას ფინანსთა სამინისტრო ავრცელებს.

შეხვედრას ქართული მხრიდან დაესწრო ფინანსთა მინისტრის მოადგილე ეკატერინე გუნცაძე.

გაცნობითი ხასიათის შეხვედრაზე განხილულ იქნა ორმხრივი და მრავალმხრივი თანამშრომლობის საკითხები, ბანკის მიერ საქართველოში დაფინანსებული პროექტების მიმდინარეობა და სამომავლო გეგმები.

საქართველოს ფინანსთა მინისტრმა AIIB-ის პრეზიდენტს გააცნო ქვეყნის ეკონომიკაში არსებული ვითარება და საშუალოვადიანი პროგნოზები და მადლობა გადაუხადა იმ წვლილისთვის, რომელიც ბანკს შეაქვს ქვეყნის მდგრადი განვითარების საქმეში.

ყურადღება გამახვილდა საქართველოს მიერ საერთაშორისო მასშტაბის ინფრასტრუქტურული პროექტების მიმდინარეობასა და მათ მნიშვნელობაზე, როგორც საქართველოსთვის, ისე ფართო რეგიონის ქვეყნებისთვის, ასევე კაპიტალის ბაზრის განვითარების მხრივ თანამშრომლობაზე.

შეხვედრაზე მხარეებმა გამოთქვეს მზადყოფნა გაგრძელდეს თანამშრომლობა ქვეყნის მდგრადი განვითარების ხელშეწყობის კუთხით. ფინანსთა მინისტრმა ბანკის პრეზიდენტი საქართველოში ვიზიტით მოიწვია.