POLITICO: ევროკავშირის ქვეყნებმა ვერ მიაღწიეს შეთანხმებას რუსეთის წინააღმდეგ სანქციების ახალ პაკეტზე მას შემდეგ, რაც საბერძნეთმა საწვავის გადაზიდვის საკუთარი სექტორის დასაცავად აღნიშნული ზომები დაბლოკა - სასანქციო პაკეტის გადასარჩენად, ხუთშაბათს დილით მოლაპარაკებების დამატებით რაუნდი გაიმართება
ევროკავშირის ქვეყნებმა ვერ მიაღწიეს შეთანხმებას რუსეთის წინააღმდეგ სანქციების ახალ პაკეტზე მას შემდეგ, რაც საბერძნეთმა საწვავის გადაზიდვის საკუთარი სექტორის დასაცავად აღნიშნული ზომები დაბლოკა, - წერს გამოცემა POLITICO.
ოთხშაბათის შეხვედრა კიდევ ერთი ნაბიჯი იყო იმ კონსენსუსის მოსაპოვებლად, რომელიც მოსკოვის სამხედრო დაფინანსების წყაროების გადასაკეტად განკუთვნილ ენერგეტიკულ და სავაჭრო ზომებს ესაჭიროება.
პაკეტის პრეზენტაცია ივნისში შედგა, თუმცა დეტალების განხილვა გაჭიანურდა, მიუხედავად იმისა, რომ მისი ცალკეული საკვანძო პუნქტები - მათ შორის რუსულ ზღვის პროდუქტებზე ემბარგო და სამხედრო პირებისთვის სავიზო შეზღუდვები - საგრძნობლად შემსუბუქდა.
ათენმა ხისტი პოზიცია დაიკავა ევროკავშირის კომპანიების მიერ ევროკავშირის ფარგლებს გარეთ რუსული გაზის ტრანსპორტირების აკრძალვის წინააღმდეგ.
საბერძნეთი აცხადებს, რომ ეს ინიციატივა სცდება ლიდერების მიერ ადრე მიღწეულ შეთანხმებას და პრაქტიკაში არაფერს შეცვლის, ვინაიდან გემები უბრალოდ სხვა ქვეყნების დროშების ქვეშ გადაფორმდებიან.
როგორც ევროკავშირის დიპლომატმა დაადასტურა, სასანქციო პაკეტის გადასარჩენად, ელჩები ხუთშაბათს დილით მოლაპარაკებების დამატებით რაუნდს გამართავენ.
როგორც განხილვებში მონაწილე ევროკავშირის სამი დიპლომატი იუწყება, ათენი ჯერჯერობით უარს ამბობს შეთავაზებულ კომპრომისზე და შეზღუდვებიდან უვადო საგამონაკლისო წესის დაწესებას ითხოვს.
იმედი
წყარო: imedinews.ge