POLITICO: ევროპელი პროკურორები იძიებენ, თუ როგორ გამოიყენა საბერძნეთმა ევროკავშირის სახსრები მიგრანტთა ბანაკების ასაშენებლად

ევროპელი პროკურორები იძიებენ, თუ როგორ გამოიყენა საბერძნეთმა ევროკავშირის სახსრები მიგრანტთა ბანაკების ასაშენებლად. ინფორმაციას ამის შესახებ გამოცემა POLITICO ინფორმირებულ ბერძნულ წყაროებზე დაყრდნობით ავრცელებს.

ევროპის საჯარო პროკურატურა (EPPO) ფოკუსირებულია პანდემიის პერიოდში, 2020-დან 2021 წლამდე, მიგრანტთა მიღებისა და განთავსების ორი ცენტრის მშენებლობაზე.

მაღალჩინოსნების თქმით, რომლებმაც POLITICO-სთან ანონიმურობის პირობით ისაუბრეს, სადავო კონტრაქტები კერძო კომპანიებს საჯარო ტენდერის გარეშე გადაეცათ და მათი ღირებულება, მსგავს პროექტებთან შედარებით, სავარაუდოდ 15-ჯერ მეტია, რამაც ჯამში 11.3 მილიონი ევრო შეადგინა.

გაზეთმა Kathimerini-მ, რომელმაც პირველმა გაავრცელა ეს ინფორმაცია, აღნიშნა, რომ საგამოძიებო ინტერესის ქვეშ მოქცეული ბანაკებიდან ერთ-ერთი მდებარეობს მალაქასაში, ათენის ჩრდილოეთით მდებარე სოფელში, ხოლო მეორე - სინტიკიში, სერესის ჩრდილოეთ რეგიონში.

2015 წელს, საბერძნეთის ეგეოსის ზღვის კუნძულები ახლო აღმოსავლეთიდან მიგრანტების ჩასვლის მთავარი პუნქტი იყო. 2019 წლამდე საბერძნეთში ბანაკებს მიგრაციის საერთაშორისო ორგანიზაცია (IOM) აშენებდა. ამის შემდეგ მსგავს პროექტებზე ზედამხედველობა საბერძნეთის მთავრობამ გადაიბარა, და კონტრაქტები, რომლებიც ახლა მოწმდება, სწორედ პირველად განხორციელებულ პროექტებს შორისაა.