POLITICO: მერცს ბერლინში, პროფკავშირების ყრილობაზე, მკვახე დახვედრა მოუწყვეს - დელეგატები მას სიტყვით გამოსვლას უკმაყოფილო შეძახილებითა და სტვენით აწყვეტინებდნენ

გერმანიის კანცლერს, ფრიდრიხ მერცს ბერლინში, პროფკავშირების ყრილობაზე, მკვახე დახვედრა მოუწყვეს - დელეგატები მას სიტყვით გამოსვლას უკმაყოფილო შეძახილებითა და სტვენით აწყვეტინებდნენ, - წერს გამოცემა POLITICO.

ყრილობაზე სიტყვით გამოსვლისას, მერცმა აღნიშნა, რომ გერმანია კეთილდღეობის შენარჩუნებას ეკონომიკური და სოციალური სისტემის ფუნდამენტური გარდაქმნის გარეშე ვეღარ შეძლებს.

„ჩვენ უბრალოდ ვერ შევძელით ქვეყნის მოდერნიზება“, - განაცხადა „ქრისტიან-დემოკრატების“ ლიდერმა. „ამიტომ, გერმანიამ ძალები უნდა მოიკრიბოს“.

დარბაზში განწყობა მალევე დაიძაბა, როდესაც მერცმა ყურადღება მკაცრი ეკონომიის ზომებსა და მოახლოებულ საპენსიო რეფორმებზე გაამახვილა.

მისი კოალიციური მთავრობა უკვე კვირებია შიდა დაპირისპირებაშია იმის თაობაზე, თუ როგორ შეამცირონ ხარჯები, თუმცა გასულ თვეში მინისტრებმა მაინც დაამტკიცეს ჯანდაცვის რეფორმის პაკეტი, რომელიც სახელმწიფო დანახარჯების მილიარდობით ევროთი შემცირებას ისახავს მიზნად.

სამომავლო გეგმებზე საუბრისას, მერცმა საპენსიო რეფორმას „ყველაზე რთულად ამოსახსნელი ამოცანა“ უწოდა.

„ეს ყველაფერი არც ჩემი და არც ფედერალური მთავრობის მხრიდან გამოვლენილი ბოროტი განზრახვა არ არის“, - აღნიშნა მან. „ეს დემოგრაფია და მათემატიკაა“. ამ ფრაზას აუდიტორიის მხრიდან უკმაყოფილო შეძახილების კიდევ ერთი ტალღა და სტვენა მოჰყვა.

ასეთი ცივი დახვედრა მერცის პოპულარობის კატასტროფული ვარდნის ფონზე ხდება. 7 მაისს გამოქვეყნებული ბოლო ყოველთვიური კვლევის (DeutschlandTrend) მიხედვით, გერმანელების მხოლოდ 13 პროცენტია კმაყოფილი მერცის კოალიციური მთავრობის მუშაობით.