POLITICO: რუსეთის „ჩრდილოვანი ფლოტი“ ევროპული სადაზღვევო კომპანიების მეშვეობით ნავთობის გადაზიდვას მაინც ახერხებს

რუსული ტანკერები, რომლებიც უკანონო ნავთობისა და ნავთობპროდუქტების გადაზიდვას ახორციელებენ, საქმიანობას მაინც აგრძელებენ, რადგან ამის შესაძლებლობას მათ ევროპული სადაზღვევო კომპანიები აძლევენ. სტატიას ამ შინაარსით POLITICO ავრცელებს.

ევროპარლამენტარ ვილე ნიინისტეს განცხადებით, რუსეთის „ჩრდილოვანი ფლოტი“ საბოლოო ჯამში ფულის გადარიცხვისთვის ევროპულ საბანკო ორგანიზაციებს იყენებს, რაც ფაქტობრივად ფულის გათეთრებაა.

როგორც გამოცემა წერს, ის, რომ ევროკავშირი რუსეთის წინააღმდეგ სანქციების 21-ე პაკეტს ამზადებს, მიუთითებს იმაზე, რომ პრობლემა არსებობს. ბრიუსელს სანქციების ახალი პაკეტით სურს შეზღუდვა დაუწესოს იმ სადაზღვევო კომპანიებს, რომლებიც მოსკოვს ნავთობის გაყიდვასა და უკრაინის ომის დასაფინანსებლად შემოსავლის მიღებაში ეხმარებიან.

POLITICO-ს ცნობით, რუსეთი მოძველებული ტანკერების, გაუმჭვირვალე სტრუქტურების ქსელის მეშვეობით ნავთობის ექსპორტს მაინც ეწევა.

მიუხედავად იმისა, რომ 2022 წელს დასავლური სადაზღვევო კომპანიების უმეტესობამ რუსეთი დატოვა, „ჩრდილოვანი ფლოტი“ რუსულ სადაზღვევო კომპანიებთან ურთიერთობს, ხოლო რუსული კომპანიები, თავის მხრივ, ევროპულ ფირმებთან არიან დაკავშირებული.

„როცა უყურებ, თუ როგორ შეიმუშავა რუსეთმა საზღვაო დაზღვევის ალტერნატიული სქემები თავისი „ჩრდილოვანი ფლოტისთვის“ და რა ზომებს მიმართა, რათა მთელი ლოგისტიკური ჯაჭვის მეშვეობით ნავთობის შეუფერხებლად მიწოდება უზრუნველყოს, დაუჯერებელია“, - ციტირებს გამოცემა კომპანია Windward-ის უფროს ანალიტიკოსს ვიზე ბოკმანს.