POLITICO: ტრამპის მიერ ჯარების შემცირების შემდეგ, ბერლინს რაკეტების დეფიციტი ექნება

გამოცემა POLITICO-ს ინფორმაციით, გერმანია იმედოვნებდა, რომ მალე აშშ შორი მანძილზე მოქმედ რაკეტებს განათავსებდა, რომლებსაც რუსეთის ტერიტორიის სიღრმეში დარტყმების მიყენება შეეძლებოდათ, თუმცა, აღნიშნული გეგმა ჩავარდა.

აშშ-ის პრეზიდენტის, დონალდ ტრამპის გადაწყვეტილება გერმანიაში დისლოცირებული ამერიკული ჯარის რამდენიმე ათასით შემცირების თაობაზე გულისხმობს იმას, რომ ამერიკა ერთ-ერთ სარაკეტო ქვედანაყოფს გააუქმებს, რომელსაც ევროპისთვის Tomahawk-ის ტიპის ფრთოსანი რაკეტები უნდა გადაეცა. აღნიშნული რაკეტების გარეშე ბერლინისა და მისი მოკავშირეების თავდაცვაში სიცარიელე გაჩნდება, წერს გამოცემა.

„აშშ-ის ადმინისტრაციის გადაწყვეტილება გერმანიაში ფრთოსანი რაკეტების არ განთავსების შესახებ სახიფათოა“, - განაცხადა გერმანიის პარლამენტის წევრმა მმართველი „სოციალ-დემოკრატიული პარტიიდან“, მეტინ ჰაკვერდიმ. „ეს ნატოს მიერ რუსეთის შეკავების პოლიტიკაში სიცარიელეს გააჩენს“.

როგორც გამოცემას ნატოს ერთ-ერთმა მაღალჩინოსანმა განუცხადა, Tomahawk-ის ფრთოსანი რაკეტები ალიანსს შესაძლებლობას მისცემდა უფრო მძლავრი დარტყმები განეხორციელებინა, ვიდრე ის შეიარაღება, რომელიც გერმანიას და ევროპის სხვა ქვეყნებს ახლა აქვთ.

2024 წელს აშშ-ის ყოფილი პრეზიდენტის, ჯო ბაიდენის მიერ მიცემული პირობა რაკეტების განთავსების შესახებ რუსეთის მიერ კალინინგრადის ოლქში „ისკანდერის“ ტიპის რაკეტების განთავსებაზე პასუხი იქნებოდა, მაგრამ ახლა ტრამპს გერმანიიდან 5 ათასი ამერიკელი სამხედროს გაყვანა სურს, წერს POLITICO.