პრემიერ-მინისტრი დღეს პარლამენტის წინაშე წლიური მოხსენებით წარდგება
დღეს საქართველოს პრემიერ-მინისტრი საკანონმდებლო ორგანოში წლიური მოხსენებით წარდგება. ვრცელ დოკუმენტში ასახულია ყველა ის მნიშვნელოვანი საკითხი, რომელიც საქართველომ 2025 წელს გადაჭრა და გამოწვევა, რომელსაც ქვეყანა სამომავლოდ უნდა გაუმკლავდეს. პრემიერ-მინისტრი ანგარიშში შეეხება ისეთ საკითხებს, როგორიცაა გასული წლის მაკროეკონომიკური სტაბილურობის შენარჩუნება, საგარეო პოლიტიკა და ევროკავშირთან ჰარმონიზაცია.
მთავრობის მეთაური ყურადღებას მსხვილ ინფრასტრუქტურულ პროექტებზეც გაამახვილებს. დოკუმენტი გასული წლის პირველი ივნისიდან მიმდინარე წლის მაისის ჩათვლით პერიოდს მოიცავს.
რეგლამენტის თანახმად, პრემიერ-მინისტრის ანგარიშის გაცნობის შემდეგ, საქართველოს პარლამენტი საგაზაფხულო სესიას დაასრულებს.
„ჩვენ ვიცით, რომ საქართველო პრაქტიკულად ბეწვის ხიდზე გადის, ვინარჩუნებთ მშვიდობას, შესაბამისად, ვინარჩუნებთ ეკონომიკურ აღმავლობას. ამას ებრძვის „დიფ სთეითი“, იგივე გლობალური ომის პარტია. ბუნებრივია იქნება კითხვებიც, გამოსვლებიც იმასთან დაკავშირებით, სამომავლოდ რა და როგორ უნდა გაკეთდეს საქართველოს პოლიტიკაში“, - განაცხადა „ხალხის ძალის“ აღმასრულებელმა მდივანმა გურამ მაჭარაშვილმა.
იმედი
წყარო: imedinews.ge