პრეზიდენტ ტრამპის რელიგიური თავისუფლების კომისიის საბოლოო ანგარიშის პროექტი: ეკლესიასა და სახელმწიფოს შორის „გამყოფი კედლის“ კონცეფციამ შესაძლოა მცდარი შთაბეჭდილება შექმნას, თითქოს ეკლესია და სახელმწიფო ერთმანეთის მოწინააღმდეგენი არიან და აბსოლუტურად განცალკევებულნი უნდა დარჩნენ - სინამდვილეში კი, ეკლესია და სახელმწიფო ერთმანეთს აძლიერებენ და მხარს უჭერენ

ეკლესიასა და სახელმწიფოს შორის „გამყოფი კედლის“ კონცეფციამ შესაძლოა მცდარი შთაბეჭდილება შექმნას, თითქოს ეკლესია და სახელმწიფო ერთმანეთის მოწინააღმდეგენი არიან და აბსოლუტურად განცალკევებულნი უნდა დარჩნენ - სინამდვილეში კი, ეკლესია და სახელმწიფო ერთმანეთს აძლიერებენ და მხარს უჭერენ, - ნათქვამია პრეზიდენტ ტრამპის რელიგიური თავისუფლების კომისიის მიერ პარასკევს გამოქვეყნებული საბოლოო ანგარიშის პროექტში.

„შესაძლოა, უფრო ზუსტი ანალოგია იყოს ის, რომ რელიგიური თავისუფლება ეკლესიასა და სახელმწიფოს შორის ხიდის ფუნქციას ასრულებს. სხვა სიტყვებით რომ ვთქვათ, როდესაც მორწმუნე ადამიანები თავიანთ რელიგიურ თავისუფლებას რწმენის პრაქტიკით იყენებენ - დაწყებული ლოცვით, ღარიბთა დახმარებითა და მოყვასისადმი ქველმოქმედებით, დამთავრებული ზნეობრივი სტანდარტების დაცვით - ისინი უფრო სრულფასოვანი ცხოვრებით ცხოვრობენ, ქმნიან მყარ ოჯახებს, აძლიერებენ ჩვენს თემებს და, საბოლოო ჯამში, განამტკიცებენ ჩვენს ერს. ამგვარად, რელიგიური თავისუფლება არ არის უბრალოდ ჩვენი საზოგადოების დანამატი. ეს არის ჩვენი რესპუბლიკის ცოცხალი გული და ამერიკის წარმატების სასიცოცხლო ძალა“, - აღნიშნულია დოკუმენტში.

„ამ თავისუფლების შესანარჩუნებლად, ჩვენ უნდა ავაგოთ ხიდები და არა კედლები, ღვთის ქალაქსა და ადამიანთა ქალაქს შორის. თუ ამას გავაკეთებთ, მომავალ თაობას თავისუფალ და აყვავებულ ქვეყანას გადავცემთ“, - ნათქვამია ანგარიშში.

კომისიის რეკომენდაციები მოიცავს სამოქალაქო განათლებისა და საზოგადოებრივი ცნობიერების ამაღლების ინიციატივებს. მათი მიზანია, ამერიკელებს აუხსნან ის რელიგიური თავისუფლების გარანტიები, რომლებიც მათ კანონით ეკუთვნით. ამ საზოგადოებრივი ინფორმირების კამპანიის ნაწილია პრინციპი, რომ ეკლესიისა და სახელმწიფოს გამიჯვნის ხაზი უკეთ შეიძლება იქნას გააზრებული, როგორც „ხიდი“ - განცალკევებული და დამოუკიდებელი, მაგრამ დინამიური ურთიერთქმედებისთვის ხელშემწყობი, სადაც რელიგიური თემები აძლიერებენ სახელმწიფოს და პირიქით.