პრეზიდენტ ტრამპის რელიგიური თავისუფლების კომისიის საბოლოო ანგარიშის პროექტი: რელიგიური თავისუფლების მთავარი საფრთხე თანამედროვე იდეოლოგიაა, რომელიც რელიგიის ჩანაცვლებას ცდილობს
რელიგიური თავისუფლების მთავარი საფრთხე თანამედროვე იდეოლოგიაა, რომელიც რელიგიის ჩანაცვლებას ცდილობს, - ნათქვამია პრეზიდენტ ტრამპის რელიგიური თავისუფლების კომისიის მიერ პარასკევს გამოქვეყნებული საბოლოო ანგარიშის პროექტში.
კომისიის წევრმა, ეპისკოპოსმა რობერტ ბარონმა, ასე აღწერა ეს დაძაბულობა იდეოლოგიასა და რელიგიას შორის: „ჩვენს ქვეყანაში რელიგიური თავისუფლების მთავარი მტერი არის... თვითშექმნის იდეოლოგია. ეს არის ფილოსოფიური პროგრამა, რომელიც უარყოფს მორალური ფასეულობების ობიექტურობასა და ადამიანური ბუნების სტაბილურობას და, შესაბამისად, გვთავაზობს, რომ მიზნისა და აზრის განმსაზღვრელი მხოლოდ ინდივიდუალური არჩევანია. რელატივიზმის ამ დიქტატურამ ფესვი გაიდგა ჩვენი ხელისუფლების, განათლებისა და ჯანდაცვის ბევრ ინსტიტუციაში და მისი მომხრეები მართებულად აღიარებენ, რომ მათი ყველაზე მნიშვნელოვანი ინტელექტუალური ოპონენტები სწორედ ისინი არიან, ვინც ტრადიციულ რელიგიას მისდევს“.
„ეს იდეოლოგია იწვევს ისეთი კანონების მიღებას, რომლებიც ფუნდამენტურად უსამართლოა და რომელთაც წინააღმდეგობა უნდა გაეწიოს არა მხოლოდ იმიტომ, რომ ისინი არღვევენ რელიგიურ თავისუფლებას, არამედ იმიტომ, რომ ისინი ხელყოფენ ყველა მოქალაქის უფლებებს“, - აღნიშნულია დოკუმენტში.
„რელიგიური თავისუფლების დარღვევები ხშირად თავისთავად უსამართლო კანონების შედეგია“, - განმარტა კომისიის წევრმა, რაიან ანდერსონმა. მან მოიყვანა სასკოლო ოლქების პოლიტიკის მაგალითი, რომელიც აგრესიულად უბიძგებს პედაგოგებს, ფარულად განახორციელონ მოსწავლეების „ტრანზიცია“ (სქესის შეცვლასთან დაკავშირებული პროცედურები).
„ბავშვისთვის ტრანზიციის ჩატარება... მით უმეტეს მშობლის ზურგს უკან, უბრალოდ უსამართლობაა. არ აქვს მნიშვნელობა, მშობელი მორწმუნეა თუ არარელიგიური. არ აქვს მნიშვნელობა, მოსწავლე მორწმუნეა თუ არარელიგიური... იმის კეთება, რაც სკოლებში არასრულწლოვნების მიმართ ხდება მშობლების მონაწილეობისა და თანხმობის გარეშე - ეს თავისთავად უსამართლოა“.
