ფრიდრიხ მერცი: მე უარს არ ვამბობ ტრანსატლანტიკურ ურთიერთობებზე მუშაობასა და დონალდ ტრამპთან თანამშრომლობაზე

გერმანიის კანცლერმა, ფრიდრიხ მერცმა აღიარა, რომ ნატოს ფარგლებში აშშ-სთან თანამშრომლობისთვის მას მოუწევს შეეგუოს იმ ფაქტს, რომ ამერიკის პრეზიდენტი დონალდ ტრამპი მის შეხედულებებს არ იზიარებს. ამ თემაზე მან ტელეგადაცემა Caren Miosga-ში განაცხადა, რასაც გამოცემა Spiegel ციტირებს.

„მე უარს არ ვამბობ ტრანსატლანტიკურ ურთიერთობებზე მუშაობასა და დონალდ ტრამპთან თანამშრომლობაზე“, - ხაზგასმით აღნიშნა მერცმა. კანცლერი კვლავ დარწმუნებულია, რომ „ამერიკელები ჩვენთვის მნიშვნელოვანი პარტნიორები არიან, ყველაზე მნიშვნელოვანი ჩრდილოატლანტიკურ ალიანსში“. თუმცა, აღიარა, რომ უნდა შეეგუოს იმას, რომ აშშ-ის პრეზიდენტს გერმანიის მთავრობისგან განსხვავებული აზრი აქვს ისეთ საკითხებზე, როგორიცაა ომი ირანში. მერცმა განმარტა, რომ თავისი პოზიცია ტრამპს თავიდანვე მკაფიოდ გაუზიარა.

„თუ გსურთ, რომ ასეთ კონფლიქტში დაგეხმაროთ, მაშინ წინასწარ დაგვირეკეთ და გვთხოვეთ ეს“, - გაიხსენა მერცმა ტრამპთან საუბარი.

მან ასევე კომენტარი გააკეთა გერმანიიდან ამერიკული ჯარების გაყვანის საკითხზე.

„ეს, შესაძლოა, გარკვეულწილად ამწვავებს სიტუაციას, მაგრამ აქ ახალი არაფერია“, - თქვა მან.