ქართველიშვილი იუკნევიჩიენეს აღიარებაზე: 2022 წლამდე ევროკავშირის არანაირ გაფართოებაზე საუბარი არ იყო და საქართველოს ამ „ღია კარში“ მხოლოდ იმისთვის ტოვებდნენ, რომ სამხედრო პოლიგონად გამოეყენებინათ „საერთო ევროპული ფასეულობების“ დასაცავად. ჯილდოდ, თუ გადარჩებოდა, მიიღებდა გაწევრინების იმ „კასტრირებულ“ პერსპექტივას, დღეს რომ უკრაინას და მოლდოვას სთავაზობენ

ეს მონაკვეთი ყველაფრით „მშვენიერია“ - იმის აღიარებით, რომ 2022 წლამდე ევროკავშირის არანაირ გაფართოებაზე საუბარი საერთოდ არ იყო და საქართველოს ამ „ღია კარებში“, ისევე როგორც ნატო-ს ორპირში მხოლოდ იმისთვის ტოვებდნენ, რომ „საათი იქს“ დადგომისას - სამხედრო პოლიგონად გამოეყენებინათ „საერთო ევროპული ფასეულობების“ დასაცავად. ჯილდოდ - თუ კი გადარჩებოდა, მიიღებდა გაწევრინების იმ „კასტრირებულ“ პერსპექტივას - დღეს რომ უკრაინას და მოლდოვას სთავაზობენ, მორიგი ბუნდოვანი ნახევრადდაპირების სახით, - წერს „ხალხის ძალის“ წევრი, დავით ქართველიშვილი, ევროპარლამენტარ რასა იუკნევიჩიენეს ვიდეო მიმართვის შესახებ.

მისივე განცხადებით, ევროდეპუტატი პირდაპირ ამბობს, რომ უკრაინამ ეს ჯილდო განადგურებული ქვეყნით, მილიონობით მიგრანტით და ასი ათასობით მსხვერპლით დაიმსახურა და ეს იყო ფასი, რომელიც საქართველოსაც უნდა გადაეხადა.

როგორც ქართველიშვილი აღნიშნავს, იუკნევიჩიენე კვლავ მიმართავს ვირტუალურ ქართველ ხალხს, „17 მაისის“ ქართველობას კი ევრობიუროკრატები კვლავინდებურად არ იმჩნევენ, მსგავსად საკუთარი ალტერნატიული გეოგრაფიისა, სადაც საქართველო მხოლოდ მაშინ ჩანს რუკაზე, როდესაც „დემოკრატიის შუქურას“ წარმოადგენს.

„პირდაპირ იძახის რასა - რომ უკრაინამ ეს ჯილდო დაიმსახურა: განადგურებული ქვეყნით, მილიონობით მიგრანტით და ასი ათასობით მსხვერპლით. ეს იყო ფასი - რომელიც საქართველოსაც უნდა გადაეხადა და „კრება ბედნიერი დარჩებოდა“. აქვე რასა კვლავ მიმართავს იმ ვირტუალურ ქართველ ხალხს, რომელმაც უნგრეთის დუნაის წყალი უნდა გადაისხას - ევროპელების „ამაყი“ წოდება რომ დაიმსახუროს. „17 მაისის“ ქართველობას კვლავინდებურად არ იმჩნევენ, მსგავსად საკუთარი ალტერნატიული გეოგრაფიისა, სადაც საქართველო მხოლოდ მაშინ ჩანს რუკაზე, როდესაც „დემოკრატიის შუქურას“ წარმოადგენს.