„რესპუბლიკელი“ სენატორი ბილ კესიდი აშშ-ირანის ურთიერთგაგების მემორანდუმზე: რეიგანი საფლავში ტრიალებს - ეს ბოლო ათწლეულების განმავლობაში საგარეო პოლიტიკის უდიდესი შეცდომაა
აშშ-ირანის ურთიერთგაგების მემორანდუმი მკაცრად გააკრიტიკა „რესპუბლიკელმა“ სენატორმა, ბილ კესიდიმ, რომელმაც ოთხშაბათს ამ გარიგებას „ბოლო ათწლეულების განმავლობაში საგარეო პოლიტიკის უდიდესი შეცდომა“ უწოდა.
„რეიგანი საფლავში ტრიალებს. ირანის ბირთვული ამბიციები არ შეჩერებულა, მათ კი ისწავლეს, რომ ჰორმუზის სრუტით შანტაჟი მუშაობს და ამ ბერკეტს მომავალშიც უდავოდ გამოიყენებენ. ახლა კი, ამ შეთანხმების ფარგლებში, ირანი სრულიად ახალ ინფრასტრუქტურას ააშენებს.
ომამდე სრუტე ღია იყო, ირანი სანქციების ქვეშ იჭყლიტებოდა, 13 სამხედრო მოსამსახურე კი ჯერ კიდევ ცოცხალი იყო. ახლა 13 ამერიკელი დაღუპულია, ოჯახებმა მილიარდები გადაიხადეს საწვავში, სანქციები გაუქმდება, დაბომბვა კი შეწყდა. ეს ბოლო ათწლეულების განმავლობაში საგარეო პოლიტიკის უდიდესი შეცდომაა“, - დასძინა სენატორმა.
TWITTER POST
მან ეს განცხადება მას შემდეგ გააკეთა, რაც ტრამპის ადმინისტრაციამ ირანთან სამშვიდობო შეთანხმების სრული ტექსტი გამოაქვეყნა, რომელიც ირანული ნავთობის ექსპორტზე სანქციების გაუქმებასა და ირანისთვის 300 მილიარდი დოლარის აღდგენით ფონდზე წვდომის მიცემას ითვალისწინებს.
მემორანდუმი მოუწოდებს ამერიკის შეერთებულ შტატებს, რომ საბოლოო შეთანხმების ფარგლებში, შეთანხმებული განრიგის მიხედვით, შეწყვიტოს ირანის ისლამური რესპუბლიკის წინააღმდეგ მიმართული ყველანაირი სანქცია, მათ შორის გაეროს უშიშროების საბჭოს რეზოლუციები, ატომური ენერგიის საერთაშორისო სააგენტოს მმართველთა საბჭოს რეზოლუციები და აშშ-ის ყველა ცალმხრივი სანქცია.
