Reuters: აშშ-მა რუსეთთან დაკავშირებული ორი გემი ჯართში ჩააბარა

აშშ-ის მთავრობამ ჯართში ჩააბარა ორი სანქცირებული ნავთობტანკერი, რომლებიც ვაშინგტონის მიერ ვენესუელაში განხორციელებული სამხედრო ოპერაციის შემდეგ რამდენიმე დღეში დააკავეს. ინფორმაციას Reuters-ი ავრცელებს.

გამოცემის ცნობით, ტანკერები გასულ თვეში დუბაიში დაფუძნებულმა გემების გადამამუშავებელმა კომპანია Global Marketing Systems-მა უცნობ თანხად შეიძინა.

გაყიდულ გემებს შორისაა Era, რომელიც ადრე Marinera-სა და Bella 1-ის სახელებით ოპერირებდა, და Lileo, რომელიც ადრე Galileo-სა და Veronica-ს სახელებით დაცურავდა. გამოცემის ცნობით, ორივე ტანკერს ინდოეთის ჯართის საწარმოებში დაშლიან.

„აშშ-ის მთავრობამ ისინი ჩვენ მოგვყიდა და გაყიდვის ნებართვას სასამართლოს შესაბამისი განკარგულებაც ჰქონდა, თუმცა გარკვეული სირთულეები არსებობს, მათ შორის ისიც, რომ ზუსტად არ ვიცოდით, ვინ ფლობდა მათ მანამდე“, - ციტირებს სააგენტო Global Marketing Systems-ის აღმასრულებელ დირექტორს ანილ შარმას.

როგორც Reuters-ი იუწყება, აშშ-ის სანაპირო დაცვამ და სამხედრო სპეცრაზმმა რუსული დროშის ქვეშ მცურავი Era იანვარში, ისლანდიის სამხრეთით საზღვაო აკვატორიაში დააკავეს, რითაც ატლანტის ოკეანეში რამდენიმე კვირის განმავლობაში მიმდინარე დევნა დასრულდა. მანამდე გემმა კარიბის ზღვაში აშშ-ის მიერ დაწესებული საზღვაო ბლოკადის გარღვევა შეძლო, რომლის მიზანიც ვენესუელიდან ნავთობის ექსპორტის შეჩერება იყო.

ვაშინგტონის განცხადებით, Era ვენესუელიდან და ირანიდან სანქცირებული ნავთობის ტრანსპორტირებისთვის გამოიყენებოდა.

იანვარში აშშ-მა კარიბის ზღვაში ასევე დააკავა რუსული დროშის ქვეშ მცურავი გემი, რომელიც ამჟამად Lileo-ს სახელით არის ცნობილი. აღნიშნული ტანკერი რუსეთის წინააღმდეგ დაწესებული აშშ-ის სანქციების ფარგლებში იყო მოქცეული.

სააგენტოს ცნობით, აშშ-მა ვენესუელაში განხორციელებული სამხედრო ოპერაციის შემდეგ სავარაუდოდ სულ 10-მდე ნავთობტანკერი დააკავა. სანქცირებული გემები აღმოჩენისა და იდენტიფიცირების თავიდან ასაცილებლად ხშირად იცვლიან სახელებს.