Reuters: ჩინეთში ქვანახშირის მაღაროში მომხდარი აფეთქების შედეგად 90 ადამიანი დაიღუპა

ჩინეთის პროვინცია შანსიში მდებარე ქვანახშირის მაღაროში გაზის აფეთქების შედეგად 90 ადამიანი დაიღუპა. ინფორმაციას Reuters-ი ავრცელებს.

სააგენტოს ცნობით, აფეთქება პარასკევს საღამოს მოხდა, როცა მაღაროში 247 ადამიანი მუშაობდა.

ჩინეთის პრეზიდენტმა სი ძინპინმა ხელისუფლებას მოუწოდა „ყველაფერი იღონონ“, დაშავებულებს სათანადო დახმარება აღმოუჩინონ და სამძებრო-სამაშველო ოპერაცია კარგად აწარმოონ. მან აგრეთვე მომხდარის მიზეზების დასადგენად გამოძიების განკარგულება გასცა. სი ძინპინის განცხადებით, დამნაშავეებმა კანონის სრული სიმკაცრით უნდა აგონ პასუხი.

სი ძინპინის ინიციატივას მხარი ქვეყნის პრემიერ-მინისტრმა ლი ციანმაც დაუჭირა. ის ადგილობრივ ხელისუფლებას დროული და სრულყოფილი გამოძიებისკენ მოუწოდებს.

საგანგებო სიტუაციების მართვის სამსახურის ადგილობრივი სამმართველოს ინფორმაციით, სამაშველო ოპერაცია ამ დრომდე მიმდინარეობს, ხოლო ინციდენტის გამოძიება უკვე დაწყებულია.