Reuters: ესპანეთში ტყის ხანძარს 11 ადამიანი ემსხვერპლა, ხოლო 19-ს ეძებენ

ესპანეთის სამხრეთში, ანდალუსიის რეგიონში გაჩენილი მასშტაბური ტყის ხანძრის შედეგად სულ მცირე 11 ადამიანი დაიღუპა, ხოლო 19 დაკარგულად ითვლება. ინფორმაციას Reuters-ი ავრცელებს.

სააგენტოს ცნობით, მეხანძრეები ხანძრის ლოკალიზებას ამ დრომდე ცდილობენ. ანდალუსიის საგანგებო სიტუაციების სამსახურის ხელმძღვანელის ანტონიო სანსის განცხადებით, დაღუპულთა შორის მხოლოდ ერთია ესპანეთის მოქალაქე, დანარჩენები კი, სავარაუდოდ, უცხო ქვეყნის მოქალაქეები არიან.

მისი თქმით, ისინი ადგილობრივი ხელისუფლების რეკომენდაციას, ადგილზე დარჩენილიყვნენ, არ დაემორჩილნენ და ავტომობილებით გაქცევა სცადეს, როდესაც ცეცხლი ალმერიის პროვინციაში, ქალაქ ლოს-გალიარდოსის მიმდებარე ტყიან ტერიტორიაზე სწრაფად გავრცელდა.

სანსის ინფორმაციით, ერთ ავტომობილში ოთხი ადამიანი დაიღუპა. სავარაუდოდ, ისინი ბრიტანეთის მოქალაქეები იყვნენ, რადგან მანქანას მარჯვენასაჭიანი მართვის სისტემა ჰქონდა. კიდევ შვიდი ადამიანის ცხედარი მას შემდეგ აღმოაჩინეს, რაც მათ ავტომობილები მიატოვეს და ევაკუაციის გეგმით გაუთვალისწინებელი მარშრუტით ფეხით გაქცევა სცადეს.

„შედეგები უმძიმესია. ყველაფერი იმაზე მიუთითებს, რომ დაღუპულთა უმრავლესობა, ან შესაძლოა ყველა, უცხო ქვეყნის მოქალაქეა“, – განაცხადა ანტონიო სანსმა.

Reuters-ი აღნიშნავს, რომ მომხდარი 2017 წელს პორტუგალიაში განვითარებულ ტრაგედიას ჰგავს, როდესაც ძლიერი სიცხის ფონზე გაჩენილ ტყის ხანძარს 60-ზე მეტი ადამიანი ემსხვერპლა, მათი დიდი ნაწილი კი გაქცევის მცდელობისას ავტომობილებში დაიწვა.