Reuters: ირანის ისლამური რევოლუციის გუშაგთა კორპუსმა სპარსეთის ყურის ქვეყნებზე თადვასხმების მოსაწყობად ერაყში ფარული ქსელი შექმნა
ირანის ისლამური რევოლუციური გუშაგთა კორპუსმა ერაყში ახალი ფარული დაჯგუფებები შექმნა, რომელთა მიზანიც სპარსეთის ყურის იმ ქვეყნების წინააღმდეგ თავდასხმების განხორციელებაა, სადაც ამერიკული სამხედრო ძალებია განთავსებული. ინფორმაციას Reuters-ი ერაყულ წყაროებზე დაყრდნობით ავრცელებს.
წყაროების ცნობით, ირანმა ამ ნაბიჯით გვერდი აუარა უკვე არსებულ შეიარაღებულ დაჯგუფებებს, რათა მისი საქმიანობა ნაკლებად შესამჩნევი ყოფილიყო. სამი წყაროს ინფორმაციით, 20 აპრილიდან 17 მაისამდე პერიოდში სამმა ან ოთხმა ფარულმა ჯგუფმა, რომელთაგან თითოეული დაახლოებით 10 ელიტური ერაყელი შიიტი მებრძოლისგან შედგებოდა, სულ მცირე შვიდი დრონით თავდასხმა განახორციელა. თავდასხმები ერაყის სამხრეთ ნაწილში, ბასრასა და სამავას მახლობლად მდებარე უდაბნოებიდან განხორციელდა და მიზანში ქუვეითის, საუდის არაბეთისა და არაბთა გაერთიანებული საამიროების ობიექტები იყო ამოღებული.
დაჯგუფებების წევრთა ნაწილი ე.წ. ერაყის ისლამური წინააღმდეგობიდან არის გადმოყვანილი. ეს ორგანიზაცია შიიტური რადიკალური ფრაქციების გაერთიანებაა, რომელსაც ათასობით მებრძოლი ჰყავს. თუმცა, წყაროების თქმით, ახალი ჯგუფები ამ სტრუქტურის სარდლობას არ ექვემდებარებიან და უშუალოდ ირანის რევოლუციის გუშაგთა კორპუსს აბარებენ ანგარიშს.
Reuters-ის ცნობით, აღნიშნული ფარული ქსელების შექმნის შესახებ ინფორმაცია აქამდე საჯაროდ არ გავრცელებულა. ადგილობრივი პოლიციის ხუთი მეთაურის შეფასებით, ეს ირანის ისლამური რევოლუციის გუშაგთა კორპუსის ტაქტიკის ცვლილებაზე მიუთითებს და მიზნად ისახავს თეირანის გავლენისა და სამხედრო შესაძლებლობების შენარჩუნებას რეგიონში იმ ფონზე, როდესაც ირანის მოკავშირე შეიარაღებული დაჯგუფებები მნიშვნელოვნად დასუსტდნენ, ხოლო თავად ირანი სამხედრო და ეკონომიკურ რესურსებს კარგავს.
ერაყი, სადაც მოსახლეობის უმრავლესობა შიიტია, მრავალი შეიარაღებული დაჯგუფების საქმიანობის არეალია, რომელთა დიდი ნაწილი თეირანთან მჭიდრო კავშირებს ინარჩუნებს. ეს ჯგუფები ირანის „წინააღმდეგობის ღერძის“ მნიშვნელოვან ნაწილს წარმოადგენენ, რომელიც ღაზის სექტორს, ლიბანს, იემენსა და ერაყს აერთიანებს, წერს Reuters-ი.