Reuters: ლუკაშენკომ უარყო ყოველგვარი ვარაუდი იმის შესახებ, რომ ბელარუსი უკრაინაში მიმდინარე ომში ჩაებმება, თუმცა განაცხადა, რომ რუსეთი და ბელარუსი აგრესიის შემთხვევაში თავს ერთობლივად დაიცავენ

ბელარუსის პრეზიდენტმა, ალექსანდრე ლუკაშენკომ უარყო ყოველგვარი ვარაუდი იმის შესახებ, რომ ბელარუსი უკრაინაში მიმდინარე ომში ჩაებმება, თუმცა განაცხადა, რომ რუსეთი და ბელარუსი აგრესიის შემთხვევაში თავს ერთობლივად დაიცავენ. ინფორმაციას ამის შესახებ სააგენტო Reuters-ი ავრცელებს.

ლუკაშენკომ ასევე აღნიშნა, რომ იგი მზად არის შეხვდეს უკრაინის პრეზიდენტს, ვოლოდიმირ ზელენსკის, რომელიც არაერთხელ მიანიშნებდა, რომ ბელარუსი შესაძლოა უფრო მეტად ჩაერთოს მიმდინარე კონფლიქტში.

„რაც შეეხება [ზელენსკის] განცხადებებს იმის შესახებ, რომ ბელარუსი ომში ჩაებმება, როგორც ახლახან ვთქვი, ეს მხოლოდ ერთ შემთხვევაში მოხდება - თუ ჩვენს ტერიტორიაზე აგრესია განხორციელდება“, - განაცხადა ბელარუსის პრეზიდენტმა.

„ჩვენ ერთად დავიცავთ ჩვენს მამულს... სადაც ჩვენი ორი ქვეყანა დგას“, - დასძინა მან.

მისივე თქმით, თუ ზელენსკის სურს „რამეზე საუბარი, დისკუსია ან შესაძლოა სხვა რამ, რა თქმა უნდა, ჩვენ მზად ვართ ამისთვის. ნებისმიერ ადგილას - უკრაინაში, ბელარუსში - მზად ვარ შევხვდე მას და განვიხილო ჩვენს ურთიერთობებში არსებული პრობლემები“.