Reuters: მონაკოში აფეთქების საქმეზე, რა დროსაც სანქცირებული უკრაინელი ბიზნესმენი მძიმედ დაიჭრა, ეჭვმიტანილი ქალია
მონაკოში რამდენიმე დღის წინ მომხდარი აფეთქების საქმეზე, რის შედეგადაც მძიმედ დაშავდნენ ბიზნესმენი უკრაინიდან ვადიმ ერმოლაევი, მისი მეუღლე და შვილი, სამართალდამცველები ქალს ეძებენ. ინფორმაციას Reuters-ი ავრცელებს.
სააგენტოს ინფორმაციით, ეჭვმიტანილი გერმანიის ტერიტორიაზე შენიშნეს. მის დასაკავებლად მონაკოს ხელისუფლებამ უკვე გამოსცა სპეციალური ორდერი. ბრალდებულზე აგრეთვე ინტერპოლის წითელი ცირკულარით გამოცხადდა ძებნა.
გამოძიების ინფორმაციით, თავდამსხმელმა საცხოვრებელი კორპუსის წინ ამანათი დატოვა, რომელიც მოგვიანებით აფეთქდა. სამივე დაზარალებული იმავე შენობის პირველ სართულზე ცხოვრობს.
თავდაპირველად სამართალდამცველები აცხადებდნენ, რომ ეჭვმიტანილი მამაკაცი იყო, თუმცა გამოძიების მიმდინარეობისას დადგინდა, რომ სავარაუდო თავდამსხმელი ქალია. სათვალთვალო კამერების ჩანაწერებში ის მუქი ფერის პანამის ტიპის ქუდითა და მუქი ტანსაცმლით არის დაფიქსირებული.
გამომძიებლების ცნობით, აფეთქების შემდეგ ეჭვმიტანილმა ფეხით გადაკვეთა მონაკო-საფრანგეთის საზღვარი. მონაკოსა და საფრანგეთს შორის სასაზღვრო კონტროლი არ მოქმედებს.
ერმოლაევი მონაკოში უკრაინაში ომის დაწყებისთანავე გადასახლდა. 2023 წლის დეკემბერში უკრაინის ხელისუფლებამ მის წინააღმდეგ სანქციები შემოიღო. უკრაინული მედიის ცნობით, ერმოლაევის წინააღმდეგ სანქციების შემოღების მიზეზი გახდა ის, რომ მან ოკუპირებული ყირიმში ალკოჰოლის ბიზნესის წარმოებაზე უარი არ განაცხადა.
იმედი
წყარო: imedinews.ge