Reuters: ნავთობის ფასი გაიზარდა მას შემდეგ, რაც ტრამპმა განაცხადა, რომ აშშ ირანს ამაღამ „ძალიან ძლიერად დაარტყამს“

ნავთობის ფასი გაიზარდა მას შემდეგ, რაც აშშ-ის პრეზიდენტმა დონალდ ტრამპმა განაცხადა, რომ შეერთებული შტატები ირანს ამაღამ „ძალიან ძლიერად დაარტყამს“ და უახლოეს პერიოდში ახლო აღმოსავლეთის ქვეყნის ნავთობისა და გაზის ინფრასტრუქტურასა და ბაზრებზე კონტროლს დაამყარებს. ინფორმაციას Reuters-ი ავრცელებს.

ბოლო პერიოდში აშშ-სა და ირანს შორის დაძაბულობა მნიშვნელოვნად გამწვავდა. თეირანმა ჰორმუზის სრუტის დახურვის შესახებ განაცხადა მას შემდეგ, რაც შეერთებულმა შტატებმა ირანის წინააღმდეგ დამატებითი დარტყმები განახორციელა, ხოლო ტრამპი ახალი იერიშებით იმუქრება იმ შემთხვევაში, თუ სამშვიდობო შეთანხმება არ იქნება მიღწეული.

Reuters-ის ცნობით, Brent-ის მარკის ნავთობის ფასი 46 ცენტით, ანუ 0.5%-ით გაიზარდა და ერთ ბარელზე 93,56 დოლარი შეადგინა. ამერიკული West Texas Intermediate (WTI) ნავთობის ფასი 65 ცენტით, ანუ 0,7%-ით გაიზარდა და ერთ ბარელზე 90,68 დოლარს მიაღწია.

მიუხედავად ამისა, სამმა ირანულმა წყარომ და ერთმა ევროპელმა ოფიციალურმა პირმა განაცხადა, რომ ვაშინგტონი და თეირანი პოლიტიკური შეთანხმების მიღწევის შემდეგ სამშვიდობო მემორანდუმის დეტალებზე მუშაობას აგრძელებენ. მათი ინფორმაციით, კვლავ გადასაწყვეტია რამდენიმე მნიშვნელოვანი საკითხი, მათ შორის ირანის გაყინული ფულის განბლოკვის მექანიზმები.