Reuters: სპარსეთის ყურის რეგიონში CIA-ს ობიექტებზე ირანული დრონებით განხორციელებული თავდასხმების შემდეგ, აშშ-ის სადაზვერვო ანალიტიკოსებმა დაიწყეს მოკვლევა იმის დასადგენად, უწევდა თუ არა რუსეთი ირანს დახმარებას

სპარსეთის ყურის რეგიონში ცენტრალური სადაზვერვო სააგენტოს (CIA) ობიექტებზე ირანული დრონებით განხორციელებული თავდასხმების შემდეგ, აშშ-ის სადაზვერვო ანალიტიკოსებმა დაიწყეს მოკვლევა იმის დასადგენად, უწევდა თუ არა რუსეთი ირანს დახმარებას სამიზნეების შესახებ ინფორმაციის მიწოდებით ან უპილოტო საფრენი აპარატების თანამედროვე ტექნოლოგიებით. ინფორმაციას ამის შესახებ სააგენტო Reuters-ი ინფორმირებულ წყაროებზე დაყრდნობით ავრცელებს.

წყაროებმა აღნიშნეს, რომ ამერიკულ მხარეს CIA-ს ობიექტებზე განხორციელებულ იერიშებში რუსეთის სავარაუდო ჩართულობაზე მყარი დასკვნები ჯერ არ აქვს.

მიუხედავად ამისა, სავარაუდო არგუმენტებად ისინი დარტყმების მაღალ სიზუსტესა და ეფექტიანობას, ასევე ირანისთვის რუსეთის მიერ გაწეულ ფართო ტექნიკურ მხარდაჭერას ასახელებენ.

Reuters-ი და სხვა მედიასაშუალებები ადრეც იუწყებოდნენ - და ეს ამერიკელმა ოფიციალურმა პირებმაც დაადასტურეს - რომ რუსეთი ირანს ეხმარებოდა კოორდინატების მიწოდებითა და სხვა სახით, როდესაც თეირანი სპარსეთის ყურის რეგიონში ამერიკულ სამიზნეებს ურტყამდა. თუმცა, CIA-ს ობიექტებზე თავდასხმების მხარდაჭერაში რუსეთის სავარაუდო ჩართულობის შესახებ დაზვერვის მიერ დაწყებული გამოძიების დეტალები აქამდე უცნობი იყო.

როგორც Reuters-ი და სხვა მედიასაშუალებები იუწყებოდნენ, მარტში დარტყმა ცენტრალური სადაზვერვო სააგენტოს, სულ მცირე, ორ ობიექტზე განხორციელდა. მათგან ერთი რიადში, აშშ-ის საელჩოში განთავსებული CIA-ს რეზიდენტურა იყო, ხოლო მეორე - ერაყის აღმოსავლეთით მდებარეობდა. ზოგიერთი წყაროს ცნობით, იერიში CIA-ს სხვა ობიექტებზეც მიიტანეს, თუმცა დეტალები არ დაუზუსტებიათ.

დასავლური სადაზვერვო სააგენტოს შიდა მემორანდუმის თანახმად, დიდი ალბათობით, რუსეთმა გარკვეული როლი ითამაშა რეგიონში მდებარე CIA-ს ობიექტებზე თავდასხმების დაგეგმვაში.